Bazarertesi künü, 27 noyabrde Qırımtatar Milliy Meclis azaları ve qırımtatar lideri Mustafa Cemilev ‘Ukrainada arap keñeşi’ cemaat teşkilãtınıñ azalarınen körüşti.
QRM reisi Eskender Bariyev qayd etkenine köre, subetdeşler Yaqın Şarqta İsrail ve Filistin çatışmasına dair vaziyetni muzakere ettiler ve ileride Ukrainanıñ müsülman dünyasınıñ temsilcilerinen, şu cümleden Yaqın Şarq ülkeleri ve eñ-evelã arap memleketlerinen bağlarına yardım meselesine diqqat ayırdılar.
Muzakere devamında ‘Ukraina ve müsülman dünyası’ adlı halqara konferentsıyanı keçirmek imkãnları qonuşıldı. Tedbirniñ maqsadı – müsülman devletleri ve yaqın Şarq ülkelerniñ diqqatını Ukrainağa ukrain-rus cenkinde yardım ve destek kösterilmesine celp etmektir. Diger taraftan ukrain cemiyetini müsülman devletleriniñ Ukrainağa destek kösterüvlerinden haberdar etmektir.
‘Şundan da ğayrı, Ukrainada Yaqın Şarq meseleleri boyunca ekspert muhitini inkişaf ettirmek, ukrain devleti Yaqın Şarqtaki kerçek vaziyeti haqqında kerek ve tolu bilgi almasını temin etilmesini muzakere ettik’,- dedi Bariyev.