Moskvadaki Lefortovo mahkemesi qapalı toplaşuvında siyasiy mahbüs Leniye Umerovanıñ tutuqlama müddetini 2024 senesi 4 yanvarğa qadar uzattı.
Bu aqta advokat Olğa Dinze haber ete.
‘Bugün mahkeme Leniyege dair hapis müddetini daha 3 ayğa, episi olıp 8 ay, yani 2024 senesi 4 yanvarğa qadar uzattı. Leniye özüni yahşı duya, ruhiy alı da normal. SİZOda Leniye çoq oquy, yoganen oğraşa, yani vaqıtnı faydalı keçire. Almaşuv ümüdi ile yaşay’, – añlattı Dinze.
Mahkeme toplaşuvı qapalı edi, çünki ‘devlet sırını bulundırğan malümatlar bildirilgen eken, faqat advokatnıñ SOTA muhbirine bergen izaatına köre, mahkemege teslim etilgen bilgilerde öyle malümat yoq.
‘Qoruyıcınıñ fikrine köre, tetqiqat üç ay içinde mahkeme evel tetqiqatını bitiremez, ve tetqiaqtçı daha bir defa Umerovanıñ müddetini uzatmaq ricasınen teklifte bulunacaq. Bu dava boyunca ekspertizalar daha tayin etilmedi ve keçirilmedi. Tetqiqatnıñ uzatılması nenen bağlı olğanı bildirilmey’,- denile beyanatta.
Siyasiy mahbüsniñ ağası Aziz Umerov ‘Suspilnıy Krım’ğa bildirgeni kibi, davası gizlenilgen, şu sebepten de qabaatlayıcı taraf hiç bir vesiqanı köstermey, advokatnen ise aşikãr etilmemesi haqqında añlaşma quruldı. Şunıñ içün de qırımtatar qızı haqqında hiç bir haber almağa imkãn bermey.
‘Şimdi oña mektüp yazmağa, desteklemege istegenler çoq, büyük qısmı da Qırımdan yazmaqtalar. Amma o oña mektüplerni qırımtatarca yazmamağa rica etti. Çünki qırımtatarca yazılğan mektüplerden dolayı onı daha çoq teşkireler ve zaten yazğan adamlarğa da havflı ola bilir’,- qayd etti Aziz Umerov.
Soñ mektüplerine köre, o özüni yahşı duya.
’10 kün bir özü hapiste olğan adam ne his etkenini köz ögüme bile ketirip olamayım, amma menim qardaşım cesür, irade ve metanet örnegidir’,- dedi Umerovanıñ ağası.
Hatırlatamız ki, 2022 senesi 4 dekabrde rusiye silãhlı küçler Leniye Umerovanı gurçistan-rusiye sıñırında yaqaladılar. Qız Kiyevden işğal etilgen Qırımğa hasta babasını ziyaret etmek içün kete edi. 16 mart kününe qadar Leniyeni Vladikavkaz yanında çetel vatandaşlarnı vaqtınca tutuv Merkezinde tuttılar. İşğalcılar qıznı ‘devlet sıñırı rejmini bozğan’ında qabaatlap, 2 biñ ruble cöreme tölettiler.
Gece 2023 senesi 16 mart künü Leniyeni çıqardılar, amma soñra tutıp, başına paket kiysetip, Vladikavkaznıñ belli olmağan rayonına ketirip qaldırdılar. Qıznı tekrar tutuqlap, polislerge qarşılıq köstergeninde qabaatladılar. 15 kün hapiste qaldırdılar. Soñra 3 defa müddetini uzattılar.
5 mayıs künü Moskvadaki Lefortovo mahkemesi Leniye Umerovanı ‘devlet hainligi’nde qabaatlap, 2 ayğa hapiske qapattı.