Cumaaqşamı künü, 2 martta, Ukraina Yuqarı Şurasınıñ insan haqları boyunca Vekãletli Kãtipligi ofisinde Ukraina tamır halqları ve milliy azğınlıqlarnıñ meseleleri boyunca Ekspert Keñeşiniñ tesis toplaşuvı keçirildi.
Toplaşuv iştirakçilerini musaviy haq ve serbestlikler, milliy azğınlıqlarnıñ haqları, siyasiy ve diniy mevamları boyunca Vekãletliniñ muavini- Mihail Spasovnen tanış ettiler. Körüşüv devamında Ekspert Keñeşiniñ reis muavini Aşot Avanesãn ve kãtibi- Lüdmila Kovalenkonı tayinlediler.
Körüşüv iştirakçileri Ekspert Keñeşiniñ işini, 2023 senesine planlarını muzakere ettiler. Qırımtatar resurs merkeziniñ reisi, qırımtatar Milliy Meclisi çetel işler ve huquq meseleleri boyunca idaresiniñ başı Eskender Bariyev böyle keñeşniñ meydanğa ketirilmesini alğışladı.
‘Keñeşniñ meydanğa ketirilmesini alğışlayım. Keñeş tamır halqlar ve milliy azğınlıqlarnıñ haqlarını qoruv boyunca devlet siyasetini şekillendirmege yardım etecek’,- qayd etti o.
Bariyev, planlaştırılğan tedbirlerniñ cedvelinen tanış olaraq, ekspertlik, talil, tasnif ve tetqiq kibi usullarğa ayrı diqqat etmek kerekligini urğuladı.
‘Daha çoq bilgi almamız, halqara merkezlernen çaşışmamız, halqara teşkilãtlar içün çeşit tevsiye ve esabatlarnı hazırlamamız bizim içün pek emiyetlidir’,-qoştı o.
Bariyev aytqanı kibi, cenkniñ milliy azğınlıqlar ve tamır halqlarğa tesir etilmesi ve Ukrainadaki miliy azğınlıqlarnı ve tamır halqlarnıñ qoruvına dair mevcut devlet siyasetinen bağlı analitik malümatlarnı işlep çıqarmaq ve taqdim etmek kerek.