Cuma künü, 10 martta ‘Tiklenüv’ Halqara Fondunıñ ofisinde ‘Demokratiya ve munasip idare’ adlı programma taqdim etildi.
Taqdimde mezkür programmanıñ hadimleri, ekspertler ve cemaat teşkilãtlarınıñ temsilcileri, şu cümleden QRM reisi Eskender Bariyev iştirak ettiler.
Tedbir iştirakçileri programmanıñ esas mevzu ve maqsatlarınen, işniñ eñ mühim yönelişlerinen tanış oldılar. Esas mevzular olaraq, devletniñ demokratik inkişafı sahası, etraftaki muhitniñ yañartılması ve qorulması kibi meseleler belgilenildi.
Hatırlatamız ki, QRM ilk künlerinden berli Qırım Muhtar Cumhuriyetiniñ deokkupatsıya ve reintegratsıyası meseleleri oğrunda çalışmaqta. Eskender Bariyev qayd etkeni kibi, yañartuvlar meselesine kelgende, umummilliy seviyede söz yürsetilmek kerek.
‘Vaqtınca işğal etilgen territoriyalar haqqında söz yürsetkenimizde bile, bir qaç kün işğal altında bulunğan ve 9 yıldan berli işğalde olğan territoriyalarnı ayırmaq kerek. Yanaşmaları bile farqlıdır. Reintegratsıya meselesine kelgende, bütün bu faktorlarnı közde tutmalımız. Bu meselede ‘Tiklenüv’ fondu ve mezkür programması grajdanlıq cemaatınıñ bu esnaslarda iştiraginde esas rolüni oynay bilir,’- añlattı ekspert.