Salı künü, 8 avgustta Qırım evinde Halqara tamır halqlar künü munasebetinen Suspilnıynıñ taqımı tarafından azırlanğan ‘Qırımım’ adlı vesiqalı film taqdim etildi.
Filmde qırımtatarlarnıñ temsilcisi Dilãver Osman, qaraylar temsilcisi Natalya Martkoviç, qırımçaq- Vãçeslav Lombrozo öz aileleriniñ hikãyelerini, milliy ürf-adetlerini nasıl saqlap qalğanları ve devam etkenlerini añlattılar.
Qırım reintegratsıyası ve tamır halqlarnıñ haqları haqqında muzakerede Qırımtatar Milly Meclis reisi Refat Çubarov, Ukraina prezidentiniñ Qırımda daimiy temsilcisi Tamila Taşeva, Ukraina medeniyet ve avropa integratsıyası meseleleri boyunca informtasıon siyaseti Naziriniñ muavini Taras Şevçenko, qQrımtatar Milliy Meclis azası Eskender Bariyev iştirak ettiler.
Öz nevbetinde Eskender Bariyev mezkür vesiqalı filmniñ çıqarılması içün minnetdarlıq bildirip, böyle kibi teşebbüslerniñ ille de şimdiki zamanda ne qadar emiyetli olğanını qayd etti.
‘Asılında ukrain cemaatı arasında Qırım ve tamır halqlar haqqında bir çoq yañlış tasavur ve fikirler mevcut. Bu yönelişte çalışıp, ukrainlerge ve diger çetel devletlerniñ sakinlerine ne içün şu tasavurlarnıñ aqiqatnen alıp berecekleri olmağanı añlatmalı’,- qayd etti o.
QRM reisi Qırımda qırımtatar halqınıñ temsilcileri daima repressiyalar altında bulunğanına diqqat çekti.
‘Al-azırda QRM bildirgenine köre, işğal devamında 294 siyasiy mahbüs ve cinaiy davalar boyunca taqip olunğanlar qayd etilgen, olardan 196- qırımtatardır’,- qoştı ekspert.