Bazarertesi künü, 15 mayısta ‘Ukrinform’ informatsıon agentliginde Qırımtatar Resurs Merkezi #LIBERATECRIMEA kampaniyası çerçivesinde qırımtatar sürgünliginiñ 79-lığına bağışlanğan matbuat konferentsiyasını keçirdi
Spikerler:
Eskender Bariyev- Qırımtatar resurs merkeziniñ reisi, qırımtatar Milliy Meclisi çetel işler ve huquq meseleleri boyunca idaresiniñ başı;
Tatyana Podvornãk- QRM kommunikatsıya meneceri;
Refat Çubarov- Qırımtatar Milliy Meclis reisi.
Matbuat konferentsıya ketişatında ukrain cemaatçılıqqa 1944 senesi qırımtatar sürgünligi haqqında hatırlatıldı. Ekspertler şimdi olıp keçken vaqialarnen qıyas etip, RF-nıñ Sovet Birligi siyasetini devam etken areketlerini talil ettiler.
‘Bugün biz qırımtatar halqınıñ 79 yıllığını qayd etemiz, amma aynı zamanda ukrain halqı da genotsidge oğratılğanına şaatmız. Yazıq ki, işğalcılarnıñ usulları hiç deñişmey: sürgünlik, tutuqlamalar, tecavuz, mahsus yerlerge köçürmeler. RF Ukrainanı yoq etmege tırışa’, – qayd etti Eskender Bariyev.
Bariyev qayd etkenine köre, bütün dünya qırımtatar sürgünligini vaqtında takbih etseydi, tarih tekrarlanamay bile edi. Şunıñ içün şimdi RF Ukrainağa qarşı yapqan cinayetleri içün ceza çekecegini bildirmek oğrunda çalışmalı.
Tatyana Podvornãk #LIBERATECRIMEA informatsıon kampaniyası çerçivesinde qırımtatar sürgünliginiñ 79 yıllığı munasebetinen azırlanılğan bütün vizual-informatsıon malümatlarnı taqdim etti. QRM temsili ‘Qırımtatar sürgünlik qurbanlarınıñ hatıra künü haqqında ne bilesiñ?’ adlı testni, plakatlar, infografika, videonı numayış etti.
‘Biz bütün informatsıon malümatlarnı eki tarihiy vaqia esasında qurmağa qarar berdik: 1944 senesi qırımtatar halqını sürgün etilmesi ve RF tarafından Ukrainağa qarşı başlatılğan cenk. Böyle etip, bu cinayetler farqlı devirlerde yüz berse de, cinayetçi aynı qalğanını qayd etemiz. Bu da 1944 senesi cinayet cezasız qalğanı sebebiden oldı’,- añlattı Tatyna Podvornãk.
#LIBERATECRIMEA informatsıon kampaniyası çerçivesinde işlep çıqarılğan plakatlar ve testni lending sahifesinde tapmaq mümkün.
Şundan da ğayrı, Refat Çubarov Milliy Meclis ve diger halqara teşkilãtlar tarafından keçirilecek mezkür tarih ile bağlı tedbirler haqqında haberdar etti.
Hatırlatamız ki, bundan evel QRM #LIBERATECRIMEA tarafından azırlanılğan yañı informatsıon kampaniyanı taqdim etken edi. Mezkür kampaniya ukrain ealini işğal etilgen Qırımdaki vaziyet haqqında haberdar etmek içün hızmet etecek.
Leyha Qırımtatar Resurs Merkezi tarafından ‘Qoşul’ halq faaliyetine destek Programması çerçivesinde amelge keçirilmekte. Mezkür programma AQŞ halqara inkişaf Agentligi(USAID) tarafından maddiy desteklenile ve Ukrainada Pact ile amelge keçirile. Leyhanıñ mündericesi sadece Pact mesüliyetindedir ve AQŞ ya da USAID noqtainazarlarını aks etmey bile.