Qırımtatar resurs merkeziniñ reisi, qırımtatar Milliy Meclisiniñ çetel işler ve huquq meseleleri boyunca idaresiniñ başı Eskender Bariyev Jeneva şeher başı Alfons Gomesnen körüşti.
Eskender Bariyev Rusiyeniñ silãhlı şiddeti şaraitinde Ukrainadaki vaziyet haqqında tarif etti ve qırımtatar sürgünliginiñ 80 yıllığı munasebeti ile Jenevadaki Milletler Meydanında sürgünlik qurbanlarına abide tiklemek teklifinde bulundı.
Şundan da ğayrı, körüşüv iştirakçileri Jenevada keçirile bilecek tedbirlerni muzakere ettiler.
QRM reisi şeher başına qırımtatar bayrağını bağışlap, 26 iyün künü, yani qırımtatar bayraq kününde şeher memuriyetiniñ binası altında kötermege teklif etti.
‘Gomes bey bizge şunı tarif etti ki, Tibet mustaqilligi künü tibet bayrağını kötergen ekenler. Men de oña Ukraina demokratik bir devlet olğanını ve şu künü qırımtatar bayrağı hem Ukrainanıñ memuriyet binaları, hem de elçilikleriniñ binaları altında köterilgenini añlattım. Yani böyle kibi teşebbüske Ukraina mıtlaq qol tutar’,- qayd etti o.