Qırımtatar Resurs Merkezi ‘Babamıznı qaytarıñız!’ adlı misilsiz vesiqalı filmni seyir etmege teklif ete.
Mezkür filmnen ukrain ve halqara cemaatçılıqnı Qırım meselesine, ana-babaları qadar azap çekken balalarnıñ mevzusına çekmege isteymiz.
Film zemanemizniñ eñ aktual ve kergin meselelerden biri – babasız balalıq mevzusını kötermekte. Biz Qırım işğalinden soñ babaları qaçırılğan ve hapiske alınğan balalarnıñ hikãyelerini topladıq. Olardan bazıları babaları qaba ve zalım şekilde tutuqlanğanlarınıñ şaatı oldılar ve şimdi olarnıñ tek bir arzuları bar: ‘Babamıznı qaytarıñız!’.
İşğal etilgen Qırımda siyasiy oyunlardan dolayı serbestlikten mahrum qalğan adamlarnıñ sayısı hep artmaqta.
QRM taqımı eñ yaqın zamanda işğal etilgen Qırımda her bir bala öz babasını quçaqlap, bahtlı balalığını devam etmesi içün elinden kelgenini yapmaqta.
Aynı şu maqsat ile QRM ‘Babamıznı qaytarıñız!’ adlı qısqa vesiqalı filmni çıqardı.
Hatırlatamız ki, ‘Babamıznı qaytarıñız!’ Norvegiya, Kiyev, Odessa, Vinnitsa, Dnepr, Zaporojye, Melitopol, Lvovda numayış etildi. Şundan da ğayrı, film 12 halqara festivalde iştirak etti ve 4 halqara festival çerçivesinde numayış etildi.