Bazar künü, 10 dekabrde, İnsan haqları künü QRM ‘Babamnı qaytarıñız’ adlı vesiqalı filmni onlayn şekilde taqdim etecek.
Bu film vastasınen ukrain ve halqara cemaatçılıqnı Qırım siyasiy mahbüslerniñ ve babalarsız çekişken balalar meselesine celp etmege ister edik.
Film eñ aktual meselelerden biri – ‘babasız balalıq’ mevzusını kötere. Babaları tutuqlanğan balalarnıñ hikãyelerini topladıq.
Siyasiy sebeplerden dolayı azatlıqtan mahrum qalğan insanlarnıñ sayısı kün-künden arta. 228 bala babalarsız ösmege mecburlar.
QRM taqımı eñ yaqın zamanda işğal etilgen Qırımda her bir bala öz babasını quçaqlar ve balalığına tolusınen sevinir degen ümütte.
İşte bu maqsat ile QRM ‘Babamnı qaytarıñız’ adlı qısqa vesiqalı filmni çıqardı.
Filmni 10 dekabrde saat 16.00 youtube kanalımızda seyir etmege mümkün olacaq.
Hatırlatamız ki, ‘Babamnı qaytarıñız’ adlı qısqa vesiqalı film Norvegiya, Kiyev, Odesa, Vinnitsa, Dnepr, Zaporojye, Melitopol, Lvovda taqdim etilgen edi. Şundan da ğayrı, film 12 halqara festivalde iştirak etti ve halqara festival çerçivesinde numayış etilgen edi.