Qırım deokkupatsıyası dekommunizatsıya ve dekolonizatsıyasız amelge keçirilmez. Yarımadada tarihiy toponimlerniñ qaytarılması – Qırımnıñ deokkupatsıyası içün bir alettir ve işğalcılarğa qarşı ideologik savaşnıñ bir usulıdır. Böyle etip, rusiyelilerniñ Qırımğa, Ukrainağa da alãqası olmağanını numayış etemiz.
Şunıñ içün de 2023 senesi 29 yanvarde QRM ve qırımtatar Milliy Meclisi yarımadanıñ tarihiy toponimleriniñ qaytarılmasına doğrultılğan ‘Adlarnı qaytarmaq – Qırımnı qaytarmaqtır’ adlı informatsıon kampaniyasını başlattılar.
QRM faaliyeti Ukraina devlet organları tarafından diqqatsız qalmağanına sevinemiz ve MHMK kãtibi Aleksey Danilov tarafından beyan etilgen Qırım deokkupatsıyası içün 12 adımnı alğışlaymız. Mezkür adımlar arasında ‘6-nci obyekt’ dep adlandırılğan Aqyar şeheri adınıñ deñiştirilmesi haqqında madde bar. Danilov qayd etkeni kibi, Ukraina Yuqarı Şurası şeherniñ yañı adı haqqında qarar alacaq ki, MHMK kãtibiniñ özü bu ad ‘Ahtiyar’ olacağınıñ ihitmalı bar, dep tüşüne.
Şeherniñ doğru adı ne olmalı?
QRM doğru adlarnı qullanmağa çağıra, çünki Ahtiyar – Aqyar adınıñ rus variantıdır. 1797 senesi rusiye imperatorı Pavel I aynı Ahtiyar adnı işletken edi.
Asılında ise Sevastopol şeheriniñ tarihiy adı qırımtatarca Aqyar adını taşıy. Aynı bu ad qaytarılsa, yarımadada rusiye izini silemeknen bir arada, tarih, medeniyet ve Ukraina tamır halqlarnıñ mirasını saqlanmasına yardım etilir.
Ukrainanıñ territorial bütünligini tiklemek içün çalışmağa devam etmektemiz!
Qırım Ukrainadır!