‘Adalet yolunı saylağan devletlerge qol tutmaq emiyetlidir’,- Andris Teykmanis

Oktãbrniñ 23-ünde  Qırım platformasınıñ  III Parlament sammiti çerçivesinde keçirilgen sayd-ivent vaqtında Andris Teykmanis spiker olaraq qoşulıp, qırımtatar halqına öz birdemligini bildirdi ve işğalcı ‘hakimiyet’ni takbih etti.
‘Qırım paltformasınıñ Parlament sammiti çerçivesinde şunı qayd etmege ister edim ki, qırımtatarlarnıñ sürgünligi insaniyetlikke qarşı cinayettir ve bütün devletler bunı tanığanı pek emiyetlidir. Bütün devletler Avropa Birliginde insaniyetlikke qarşı cinayetlerge nisbeten farqlı fikirlerge baqmadan  halqara huquqqa riayet etmeli’,- qayd etti Teykmanis.
Latviya diplomatı ve Latviya prezidenti kantselãriyasınıñ yolbaşçısı Egils Levit şunı hatırlattı ki, Latviya sakinleri de sovet işğali vaqtında Sibirge bir qaç kere sürgün etilgen ediler. Faqat farqı şunda ki, sağ qalğanlar Stalin ölgen soñ qaytıp oldılar qırımtatarlar ise tek 1991 senesi avdet ete bildiler.
‘Adalet yolunı saylağan devletlerge qol tutmaq emiyetlidir. Latviya Cumhuriyetiniñ seymi Ukraina Yuqarı Şurasından soñ qırımtatar sürğünligini genotsid olaraq tanığan birinci parlament oldı’,- qayd etti Teykmanis.
Hatırlatamız ki, ‘Qırım platforması’ – Ukraina tarafından 2021 senesi teşkil etilgen halqara diplomatik teşebbüstir. O, Qırım deokkupatsıyasına, yarımada sakinleri, ayrıca da qırımtatar haqlarınıñ qorulmasına ve işğal etilgen territoriyalarda yapqan cinayetleri içün rf-nı mesuliyetke çağırılmasına doğrultılğan halqara ğayretlerini nezaret etmek maqsadınen quruldı.