Qırımtatar Resurs Merkezi qırımtatar sürgünlik qurbanlarını añma künü munasebetinen içtimaiy ağlarda informatsıon aktsıyanı başlay. Pervasız olmağanlarnı, özüni ülkeniñ añlı vatandaşı sayğan her kesni bizge qoşulmağa davet etemiz.
Ukrain ve halqara cemaatçılıqqa insaniyetlikke qarşı bu deşetli cinayetni, 1944 senesi qırımtatarlarğa qarşı genotsidni hatırlatmağa isteymiz. Umumen Qırımdan 238 500 adam köçürilgen edi, ilk yılları ise olardan 46,2% elãk oldı.
Şu qorqunçlı yıllarnı unutmamaq kerek, ayrıca şimdi, tarih tekrarlanğan zamanda. Rusiye Federatsıyası Sovet Birliginiñ siyasetini devam ete, çünki Ukrainağa qarşı başlatqan cenkniñ esas maqsadı- ukrain halqını, onıñ medeniyetini yoq etmektir. Her kün öldürme, qaçırmalar, zorbalıqnen yerlerni deñiştirtmeler – bular hepisi bugünniñ kerçekleridir.
‘Cinayet takbih etilmeli’ aktsıyasına qoşulıñız, RF-nıñ toqtamağan cinayetlerini bütün dünyağa aşikãr etmeli. 1944 senesi qırımtatar sürgünligi takbih etilmegeni yañı cinayetlerge yüz berdi. Rf al-azırda ukrain halqına qarşı genotsid kerçekleştirmekte. Biz bunı toqtatmalımız.
Pervasız qalmağanlarnı, her bir insannı bizge qoşulmağa ve içtimaiy ağlarda öz sahifelerinde teklif etilgen resimlerden birini paylaşmağa davet etemiz.
Bu plakatlar #LIBERATECRIMEA halqara areketiniñ faalleri tarafından işlenildi. Ukrain ressamı Andrey Yermolenkonıñ ustalığı sayesinde ise resim sıfatına malik oldılar.
#LIBERATECRIMEA kampaniyası QRM tarafından Halqara inkişaf boyunca AQŞ Agentligi ile maddiy desteklengen ‘Qoşul!’ adlı cemaat areketine destek olğan Programma çerçivesinde keçirildi. Kampaniya mündericesi Pact mesüliyetligindedir ve Halqara inkişaf boyunca AQŞ Agentligi ya da AQŞ hakimiyetiniñ noqtainazarlarını aks etmey bilir.