Çarşenbe künü 18 mayısta, qırımtatar sürgünlik qurbalarınıñ hatırasına halqara matem onlayn mitingi keçirildi. Miting bütün dünyada seyir etildi, qırımtatarlarına öz destegini bildirmek içün ise Latviya,Türkiye temsilcileri, vaqtınca işğal etilgen Ukraina territoriyalarınıñ reintegratsıya Nazirligi, faaller, siyasetçi, diplomat, qırımtatar ve ukrain diasporalarınıñ temsilcileri qoşuldılar.
‘78 sene evel, 1944 senesi mayısnıñ 18-inde Sovet Birliginiñ kommunist rejimi tarafından insaniyetlikke qarşı deşetli cinayet kerçekleştirildi- Qırımnıñ tamır halqı qırımtatarlarnı yer yüzünden yoq etmege tırıştılar. Öz Vatanından bütün halq sürgün etilgeni ve ileride ğurbetlikte vahşiy şaraitlerden dolayı qırımtatar halqı nüfüziniñ 46 % ğayip etti’,- dep başladı mitingni QRM reisi Eskender Bariyev.
Bariyev bütün dünyanı Qırım tamır halqınıñ sürgünlik qurbanlarını añmağa, işğal etilgen Qırımda qalğanlar ve Ukrainanıñ azatlığı oğrunda cebede küreşken askerlerge birdemlikni bildirmege davet etti.
Onlayn mitingge qoşulğanlar:
Qırım müsülmanları diniy idaresiniñ müftisi Ayder Rustamov
Ukraina baş naziriniñ muavini – vaqtınca işğal etilgen Ukraina territoriyalarınıñ reintegratsıya Naziri İrina Vereşçuk
Latviya Cumhuriyetiniñ seym reisi İnara hanım Murniyetse
Türkiye Prezidentiniñ baş mesleatçısı Yalçin Topçu
Dissident, SSSR devrinde siyasiy mahbüs, rusiye huquqqoruyıcısı, jurnalist ve cemaat erbabı Aleksandr Podrabiyenko
Türkiyede qırımtatar teşkilãtlar platformasınıñ reisi Ümit Şilit.
Huquqqoruyıcı, advokat Nikolay Polozov
Türkiyede qırımtatar medeniyet ve birdemlik teşkilãtları Assotsıatsıyasınıñ başı Mukremin Şagin
Qırımtatar halq lideri Mustafa Cemilev
Qırımtatar Milliy meclis reisi Refat Çubarov
QR meneceri Lüdmila Korotkih rezolütsıyanı oquyaraq şunı qayd etti ki, 1944 senesi qırımtatar sürgünlik qurbanlarınıñ hatırına bağışlanğan onlayn mitingniñ işirakçileri:
– qırımtatar sürgünlik qurbanlarınıñ hatırına başlarını egip, rusiye ordusı tarafından Ukraina territoriyasında kerçekleştirilgen insaniyetlikke qarşı cinayetler neticesinde onlarnen biñ qurban ketkenine kederini bildireler;
– işğal ve cenk şaratlerinde Ukrain devletine sadıq qalğan cesür qırımtatar halqına destegini bildireler;
– qırım siyasiy mahbüsleriniñ metanet ve sabitligini taqdirleyler;
– Ukraina silãhlı küçlerine minnetdarlıq ve hürmetini bildireler;
– sıñır mudafaasında ve Ukraina silãhlı küçlerinde hızmet etken Qırım sakinleriniñ fedakãrlıq ve cesürliginen ğururlanalar;
– göñülli, faal cemaat erbapları, jurnalistlerniñ ukrain halqınen birlikte emiyetli rolüni taqdirleyler.
‘Qırımtatar sürgünlik qurbanlarınıñ hatırasına bağışlanğan onlayn miting iştirakçileri qırımtatar Milliy Meclisiniñ mevamına qol tutar ekenler, rusiye-ukrain cenki Ukrainanıñ territorial bütünligi, muhtariyetiniñ tiklenilmesinen yekünlecegine eminler’,- dep sözüni bitirdi Korotkih.
Hatırlatamız ki, 2015 senesi 12 noyabr künü Ukraina Yuqarı Şurasınıñ fermanı ile 18 mayıs künü qırımtatar sürgünlik qurbanlarınıñ hatıra künü olaraq, 1944 senesi sürgünlik ise genotsıd olaraq tanıldı.