Qırımtatar Maaliy Merkezi Birleşken Milletler tamır halqlarınıñ aqları Ekspert mehanizmine sürgünlikte qırımtatarlar kömülgen yerler aqqında malümatnı yolladı. Şu malümat BM tamır halqları aqlarınıñ beyannamesine köre, ölülerniñ naaşları ve tamır halqlarına ait kutsal ve muqaddes şeylerni yurtlarına qaytaruvına dair maruza azırlanğanda qullanılacaq.
2020 senesi martnıñ başında Qırımtatar Maaliy Merkezi "Unutılmağan qabirler" kampaniyasını ilân etti. Kampaniya çerçivesinde sürgünlikte qırımtatarlar defin etilgen yerler aqqında malümat toplanıp, tertipke ketirildi. Elde etilgen malümatnı Qırımtatar Maaliy Merkezi Birleşken Milletlerge yolladı.
Qırımtatar Maaliy Merkezi öz malümatında Ukraina, Özbekistan, Qırğızistan, Tacikistan, Rusiye ve Qazahistanğa Qırımtatar Milliy Meclisi ve Qırımtatar Maaliy Merkezinen işbirlikte, BM tamır halqları aqlarınıñ beyannamesiniñ 12 maddesiniñ ekinci qısmına esaslanıp, malümatnı toplamağa, qırımtatarlar kömülgen yerlerni yoqlap, sicil tertip etmege ve olarnıñ saqlanuvını teminlemege, bundan ğayrı sürgünlik yerlerinden qırımtatarlarnıñ naaşlarını Qırımğa qaytaruv mehanizmini işlep çıqarmağa tevsiye ete.
"BM tamır halqları aqlarınıñ beyannamesiniñ 2, 3, 4 maddelerine köre, Rusiye qırımtatar halqınıñ vatanı – Qırım yarımadanıñ işğalini toqtatmalı. Şu al qırımtatar halqınıñ öz vatanına sürgünlikten ecdatlarınıñ naaşlarını qaytarmağa olğan aqlarını kerçekleştirmegen esas sebeplerinden biri ola", – denile Qırımtatar Maaliy Merkeziniñ malümatında.
İnsan aqları şurasınıñ 33/25 qararınıñ 2b maddesine köre, Birleşken Milletler tamır halqlarınıñ aqları Ekspert mehanizmi tamır halqları aqlarınıñ beyannamesine esaslanıp, ölülerniñ naaşları ve tamır halqlarına ait kutsal ve muqaddes şeylerni yurtlarına qaytaruvına dair maruza azırlaycaq. Azırlanğan vesiqanıñ leyhası 13-ci toplaşuvlarında muzakere etilecek. Vesiqanıñ soñki versiyası İnsan aqları şurasınıñ 45-ci toplaşuvında baqılacaq.
"Unutılmağan qabirler" kampaniyası devam etile.