Doquz yıl evel, 2014 senesi 3 mayısta 5 biñge yaqın qırımtatar Ermeni bazar şeherine sıñırğa yaqınlaşıp, öz liderleri – Mustafa Cemilevni qarşılamaq içün toplaştılar. Bundan evel, rusiye hakimiyeti tarafından 2019 senesine qadar Vatanına kelmege yasaq etilgen eken, faqat Mustafa bey hiç bir vesiqanı imzalamağan edi.
Qırımtatarlarnıñ maşna saflarına rusiye OMONI tarafından Ermeni bazar yanında yollar qapatıldı. Buña baqmadan faaller muqavet kösterip, sıñır yanına Mustafa Cemilevni körmek içün cayav kettiler. Anda olar Qırımğa kirilmesine yasaq etilgen ve öyle de Vatanına yiberilmegen qırımtatar halq lideri Mustafa Cemilevnen körüştiler. Şundan da ğayrı, mezkür qararğa qarşılıq itiraz olaraq, işğal etilgen Qırımda yollar qapatılmağa başlandı.
Neticede, yüzlernen ‘cinaiy iş’ açılıp, şartiy hükümler çıqarıldı, qırımtatar evlerinden onlarnen tintüv keçirildi, körüşüv iştirakçileri cöremelerge mahküm etildi. Şundan da ğayrı, qırımtatarlar sorğularğa çekilindi, tutuqlanıldı.
İlk tintüvlerden biri QRM reisi, qırımtatar Milliy Meclis azası Eskender Bariyevniñ evinde keçirildi. O ve yaqınları sorğuğa çağırıldı.
İnsanlar tekrar Qırımğa qaytmaları içün işğalcılar öz şartlarnı çıqardılar ki, olardan biri de – Mustafa Cemilevge Qırımğa kirmek yasağı. Şu sebepten de qırımtatar halq lideri Mustafa Cemilev Kiyevge qaytmağa mecbur oldı.
5 yıllıq yasaq müddeti bitkenine baqmadan Mustafa Cemilev şimdi de Qırımğa ayaq basamay, çünki işğalcılar tarafından oña qarşı bir qaç cinaiy dava açılıp, özüne nisbeten halqara arama ilãn etildi.
Şunı qayd etmege ister edik ki, 2014 senesi 3 mayıs künü olıp keçkenler qırımtatar halqınıñ vatandaşlıq mevamını ve adaletsizlikke qarşı küreşmege azır olğanını numayış etti.