On Friday, August 19, an expert discussion was held in Kyiv: Cessation of the illegal Russian annexation of Crimea and de-occupation of the peninsula: optimal ways and mechanisms.
Spikerler olaraq çıqışta bulunğanlar:
Eskender Bariyev – Qırımtatar resurs merkeziniñ reisi, qırımtatar Milliy Meclisi çetel işler ve huquq meseleleri boyunca idaresiniñ başı;
Refat Çubarov- qırımtatar Milliy Meclis reisi;
Mariya Tomak- Qırım platformasınıñ faaliyetini temin etüv hızmetiniñ yolbaşçısı;
Valeriy Çalıy- UKMTS İdare Reisi, Ukraina Fevqulade ve Vekãletli Elçisi.
Tedbir devamında iştirakçiler nevbetteki meselelerni muzakere ettiler:
1. Qırım işğaliniñ toqtatılması ve yarımadanıñ deokkupatsıya strategiyası nasıl olmalı?
2. Qırımnı işğalden boşatılmasınıñ tezligi ve usullarına tış ve iç tesiriniñ faktorları. Qırım platformasınıñ rolü.
3. Yarımadada ukrain suvereniteti bütünley tiklenilgen soñra, Qırım nasıl inkişaf etecek?
4. Yarımadanıñ deokkupatsıya ve reintegratsıyasında tamır halqlarnıñ rolü.
QRM reisi Eskender Bariyev öz çıqışında ukrain cemaatınen sıq çalışmaq, onı işğal etilgen Qırımdaki vaziyeti haqqında haberdar etmekniñ kerekligini qayd etti.
‘Biz daima ukrain cemiyetini Qırımnı qaytarmaq oğrunda küreşine çeşit usullarnen celp etemiz. Men videorolikler, içtimaiy ağlardaki aktsıyalar, bord kampaniyalar, testler haqqında bahs etem. Bularnı hepisini Ukraina sakinleri Qırım haqqında, tamır halqlar, olarnıñ medeniyeti, tarihı haqqında bilsin, dep yapamız’,- añlattı o.
Bariyevniñ fikrine köre, Qırım platformasınıñ ülke-azalarınen faal çalışmaq kerektir.
‘Şu ülkelerniñ yolbaşçıları Ukrainağa destek bildirseler bile, Rusiye teşviqat işlerini hiç toqtatmay. Şunıñ içün de, biz çeşit aktsıyalarını keçirip, şu ülkeler vatandaşları kerçek vaziyetni añlağanını isteymiz. Demokratik ülkelerde siyasiy liderlerniñ fikri halqnıñ fikrinen bağlıdır. Bu pek mühim, çünki ittifaqdaşlarımıznıñ destegi olmasa, biz ğalebe qazanıp olamaycaqmız’,- qoştı ekspert.