2022 senesi 18 mayıs künü Qırımtatar resurs merkezi bütün Ukraina boyunca qırımtatar sürgünliginiñ 78 yıllığı munasebetinen informatsıon kampaniyasını başlattı.
Plakatlarda ukrain cemiyetine rusiye hakimiyetiniñ artıq muntazam şekilde yüz bergen cinayetlerni numayış etile. Dünya 1944 senesi qırımtatar sürgünligini takbih etmedi ve cezasız qalğan cinayet yañılarğa yol açtı. Al-azırda Rusiye ukrain halqınıñ genotsıdını kerçekleştire.
Yazıq ki, 78 yıl keçkenine baqmadan tarih tekrarlana. RF ukrain halqını yoq etmege tırışıp, Sovet hakimiyetiniñ siyasetini devam ete. RF kütleviy şekilde öldüre, qadınlarğa qarşı tecavuz ve şiddet köstere, balalarnı qaçıra, ukrainlerni Rusiye topraqlarına köçüre, evlerini ise darma-dağın qaldıra, tıpqı 1944 senesi sovet hakimiyeti yapqanı kibi.
1944 senesi Qırımdan 238 500 adam sürgün etildi, olardan 46,2% elãk oldı. Bir çoq insan öz vatanında yaşamaq imkãnından mahrum qaldırıldı. Şimdi ise Rusiye Ukrainağa qarşı cenk başladı. BMT(OON) malümatlarına köre, rusiye askerleri 3540 adamnı öldürdiler. 1 mln 185 biñ ukrain vatandaşı RF territoriyasına köçürilgen. Çetelge ise 5.5 mln ukrain ketken.
Biz bunu toqtatmalımız.
Fotoda İvano-Frankovsk şehrinde yerleştirilgen plakatlarnı köre bilesiz. Bu resimler sayesinde şeher sakinleri 1944 senesi ve 2022 senesi künümizde yüz bergen facialı vaqialar haqqında ögrene bilecekler.
1944 senesi genotsidi, tıpqı 2022 senesi ukrain halqınıñ genotsidi kibi bütün dünya tarafından tekbih etilmeli.
Plakatlar QRM, #LIBERATECRIMEA halqara areketi ve ukrain ressamı Andrey Yermolenko tarafından işlep çıqarıldı.