82 yıl evel qırımtatar ziyalılarınıñ büyük qısmı yoq etildi.
1938 senesi aprelniñ 17-de Aqmescitte Stalinnıñ emri ile NKVD hadimleri tarafından 36 körümli qırımtatar ziyalı qurşunğa tizildi. Olarnıñ arasında Asan Sabri Ayvazov, Yakub Ablâmitov, Yakub Azizov, Osman Aqçoqraqlı, Ramazan Aleksandroviç, Usein Bodaninskiy, Yağya Bayraşevskiy, Cafer Gafarov, Kerim Cemaledinov, Suleyman İdrisov, İbraim İsmailov, Abdulla Lâtif-zade, Fevzi Musanif, Mamut Nedim, Abduraim Samedinov, İlyas Tarhan, Server Trupçu, Seitcelil Hattatov, Bilâl Çagar ve başqaları. Bu – cedvelniñ eñ belli adlarıdır. Lâkin öldürülgen ziyalılar arasında belli olmağan, "adiy" insanlar da bar edi. Olarnıñ tercimeiallarını biz endi bilip olamamız.
Bugün halqımıznıñ ulu vekillerini hatırlap, biz qırım tatarlarınıñ keleceginen bağlı areketler ve amellermizni tüşünip etmelimiz.
Allah rahmet eylesin.
Eskender Bariyev,
Qırımtatar Maaliy Merkezi idaresiniñ yolbaşçısı,
Qırımtatar Milliy Meclis azası