Ukrainada ukrain siyasiy mahbüs künü 1975 senesinden başlap siyasiy erbap ve dissident Vãçaslav Çernovolnıñ teşebbüsi ile qayd etile. Bu kün sovet rejiminiñ zulumına, repressiyalarına qarşı küreşmek maqsadınen belgilengen edi. O vaqıtta yüzlernen faalli şahsiy vatandaşlıq mevamları içün onlarnen yıllarğa serbestlikten mahrum qaldırıldı. Yazıq ki, devirler deñişse de, vaziyet deñişmey. RF Sovet Birliginiñ areketlerini devam etmekte.
Qırım işğalinden soñra RF öz qanuncılıqnı siyasiy menfaatları içün qullanaraq, yarımdada qırımtatarlarğa ve ukraintaraflı faallilerge qarşı repressiyalar başladı. İnsanlarnı taqip etmek, tutuqlamaq aman-aman her künlük adetlerge çevirildi.
QRM malümatlarına köre, işğal devri içinde siyasiy mahbülser ve taqip etilgenlerniñ sayısı 306 yetti, olardan 206- qırımtatarlarğa nisbeten. Mezkür kategoriya 5 unsurdan ibaret:
-mahküm etilgenler ve koloniyada ceza çekkenler (150, 99- qırımtatar);
-sıñırlama ya da sınav müddetleri olğanlar (34, 20-qırımtatar);
-SİZOda (35, 26-qırımtatar);
-azat etilgenler (54, 34-qırımtatar);
-taqip etilgenler( 33, 27- qırımtatar).
Şundan da ğayrı, Ukraina cenki başlanğanından berli haqsız tutuqlama ve yaqalamalar yañı işğal etilgen Herson ve Zaporojye vilãyetlerinde de yüz bermege başladı.
QRM siyasiy mahbüslerniñ azat etilmesini talap eterek, halqara cemaatçılıqnı, halqara huquqqoruyıcı teşkilãtlarnı RF ve Qırımnıñ işğalcı hakimiyetine qarşı, siyasiy taqiplerni toqtatmaq maqsadınen, basqılarını arttırtmağa çağıra.