BMT(OON) teşebbüsi ile 1 oktãbrde Halqara esli-başlılar künü qayd etile.
İşğal etilgen Qırımnıñ başı Sergey Aksönov öz telegramm-kanalında mezkür künnen hayırlap, ‘üyken nesil destegimizge muhtac’ olğanını ve ‘qartlarımızğa diqqat ve sayğı köstermek her birimizniñ boyun-borcu’ olğanını qayd etti.
Aynı zamanda işğalcılar Qırımda tamam aksinesini yapmaqtalar. İnsanlar yaşına baqmadan, cınsına baqmadan şiddet ve basqı altına tüşeler.
QRM malümatlarına binaen bugünde – bugün SİZO ve koloniyalarda 10 üyken yaşta mahbüsimiz bulunmaqta:
Gaziyev Servet- 63 yaşında
Dovgopolaya Galina – 68 yaşında
Omerov Enver- 62 yaşında
Prihodko Oleg- 65 yaşında
Muratov Zekerya – 66 yaşında
Bekirov İnver – 60 yaşında
Mambetov Halil – 68 yaşında
Abbozov Seityaga – 66 yaşında
Eyupov Azamat – 60 yaşında
Seydaliyev Nasrulla – 64 yaşında
Servet Gaziyev, İnver Bekirov, Enver Omerov, Zekirya Muratov, Galina Dolgopolaya, Nasrulla Seydaliyev ve Oleg Prihodko endi 18-5 sene hapiske mahküm etildiler.
Şundan da ğayrı, rusiye SİZOsında qırımtatar siyasiy mahbüs Cemil Gafarov 61 yaşında vefat etti.
QRM qayd etkenine köre, siyasiy mahbüslerniñ yaşını köz ögüne alsaq, böyle müddetler olar içün ömür soñu ola bilir, oldı da. Hem de mahbüslerniñ ağır hastalıqları kerekli şaraitler olmadan , tibbiy yardım vaqtında ve kerek seviyede kösterilmegeninden arta ve fenalaşa.
Mahbüslerge munasebet köstermekniñ Minimal standart qaidelerge köre olar hepisi tibbiy yardım haqqına sahipler, amma onı hiç körmeyler. Koloniyada keçirilgen yıllar ise üyken yaşta adamlarımız içün ayrı bir işkencedir.
Qırımtatar Resurs Merkezi rf-dan yuqarıda adları keçken ve diger siyasiy mahbüslerni azat etmek ve işğal etilgen Qırımda insan haqlarını bozmaqnı toqtatmağa talap ete.