Qırımtatar Resurs Merkeziniñ İdare Reisi, Qırımtatar Milliy Meclisiniñ azası Eskender Bariyev qırımtatar halqı genotsidiniñ 82 yıllığına bağışlanğan matbuat konferentsiyasında 1944 senesi sürgünliginiñ genotsid olaraq halqara seviyede tanılması tek qırımtatar halqı içün degil, bütün demokratik dünya içün müim olğanını qayd etti.
Tedbirni Qırımtatar Resurs Merkezi, Ukrayinanıñ Etnosiyaset ve vicdan serbestligi devlet hızmeti ve Qırımtatar Milliy Meclisi teşkil ettiler.
” Genotsidniñ tanılması – adaletke yoldır. Keçmişte etilgen cinayetlerge kerekli qıymet kesilmese, kelecekte olarnıñ tekrarlanmasını toqtatmaq mümkün degil”, – Bariyev dedi.
1944 senesi mayıs 18-de sürgünlik neticesinde qırımtatar halqı Qırımdan zorbalıqnen çıqarıldı, sürgünlikniñ ilk yıllarında halqnıñ 46,2% elâk oldı – o hatırlattı.
Bariyevniñ aytqanına köre, sürgünlik tek insanlarnıñ beden yoq etilmesine degil de, qırımtatar kimliginiñ, medeniyetiniñ, tiliniñ, tarihiy hatırasınıñ ve Vatan aqqınıñ yoq etilmesine de doğrultılğan edi.
“Bugün rusiye Qırım işğali şaraitinde bu siyasetini devam ete. Meclis yasağı, qırımtatarlarnıñ sistematik tintüvleri, apis etüvleri ve taqip etilüvi – genotsid siyasetiniñ devamıdır. QRM-niñ malümatına köre, bugün 358 insan siyasiy mabüs, olardan 181 – qırımtatar halqınıñ vekili”, – dep qayd etti.
Bariyev halqara adliyecilikniñ müimligini de qayd etti.
“Bugünge qadar Ukrayinanen beraber doquz devlet qırımtatar halqınıñ sürgünligini genotsid olaraq tanıdı. Bu facia aqqında kerçekni bütün dünyağa bildirmek içün bu işni devam etmek kerekmiz”, – o dedi.
O, Ukrayina Nazirler Kabinetiniñ Qırımtatar Milliy Meclisiniñ Ukrayina tamır halqınıñ temsiliy organı statusını qanuniy şekilde pekitmek qararını qayd etip, bunı tarihiy adaletniñ tiklenüvi içün müim adım olaraq adladı.
Soñunda Bariyev halqara toplulıqnı rusiye federatsiyasına siyasiy-uquqiy basqını quvetleştirmege, siyasiy mabüslerniñ azat etilmesini talap etmege ve Qırımnıñ işğalden azat etilmesi oğrunda Ukrayinanıñ küreşine qol tutmağa çağırdı.