İşğal etilgen Qırımda tibbiyet nezareti altında 2557 insan buluna. Olarnıñ arasında 1388 insan evde, 281 insan hastahanelerde, ve 888 insan observatorlarda buluna. Bu aqta Qırımnıñ "sağlıq nazirligi" saytında haber etile.
Cumaertesi künü, mayısnıñ 30-da "Strateji-30" teşebbüsniñ iştirakçileri Moskvada qırımtatar ve ukrain siyasiy mabüslerge qol tutıp, bir kişilik piketlerni ötkerdiler. Olar qollarında "Siyasiy basqını toqtatmaq", "Siyasiy mabüslerni ölümden qurtarıñız", "Teraktsız terroristler", "Qırğınlıq vaziyetinde Rusiyede er bir çıqarılğan üküm – ölüm ükmüdir" degen yazuvlı şiarlarnı tuta ediler. Bu aqta faaller öz Facebooktaki saifesinde haber ettiler.
Avropada Havfsızlıq ve İşbirlik Teşkilâtında ABD eyeti nevbetteki kere Rusiyeni Qırımnı terk etmege ve siyasiy ya da diniy baqışları içün apiste tutılğan Ukraina vatandaşlarını azat etmege çağırttı. Bu aqta eyetniñ saytında haber etile.
6 yıl evel, 2014 senesi mayısnıñ 30-da, işğal etilgen Qırımda "Ukraina evi" faali Seyran Zinedinov ğayıp oldı. Ale daa onıñ aqqında iç bir malümat yoq. Seyran evelleri ğayıp olğan Timur Şaymardanov ve Leonid Korjnı qıdıra edi. 2014 senesi mayısnıñ 30-da o, Timur Şaymardanovnıñ ömür arqadaşınen körüşip, Timur Rusiye tarafdarlarında olğanını tahmin etti. Şu körüşüvden soñ Seyran evge qaytmadı.
Cumaertesi künü, mayısnıñ 30-da, siyasiy mabüs, Bağçasaraydaki ekinci "Hizb ut-Tahrir davasınıñ" iştirakçisi Ernes Ametov 35 yaşını toldurdı. O, öz doğğan kününi taqiqat tevqifhanesinde qayd etmege mecbur. Anda onı ve "davanıñ" başqa iştirakçilerini Qırımnıñ işğalci akimiyeti qanunsız şekilde tuta. Qırımtatar Maaliy Merkezi can-yürekten Ernes Ametovnı doğğan kününen hayırlay! Tezce apisten azat etilip, qorantanen qavuşmağa tileymiz! Allah baht, sabır ve sağlıq bersin!
Rusiye Tış işler nazirligi, mayısnıñ 18-de Türkiye Cumhuriyetiniñ memurları ve qırımtatar diasporasınıñ temsilcileri ile ötkerilgen qırımtatar halqı soyqırımnıñ 76 yıllığına bağışlanğan halqara matem onlayn-mitingine qarşılıq kösterdi. Nazirlik öz beyanatında sanki facianıñ ahlâqsız şekilde qullanuvını qayd etip, mitingde Qırımğa nisbeten Stalin rejiminiñ basqısı şimdiki Rusiyeniñ siyasetinen qıyaslanğan içün öz raatsızlığını bildirdi.
İşğal etilgen Qırım yarımadasında 530 koronavirus hastası aqqında belli oldı. Olarnıñ arasında Qırım Muhtar Cumhuriyetinde 369 ve Aqyarda 161 insan qayd etildi. Bu aqta Qırımnıñ "Sağlıq nazirligi" ve Aqyar "akimiyeti" saytlarında haber etildi.
Avropa Birliginiñ tış işleri ve havfsızlıq siyaseti boyunca Yuqarı temsilcisi Josep Borrell, Avropa Birligi Ukrainanıñ mustaqilligi ve hudud bütünligine qol tutıp, Rusiye tarafından Qırımnıñ işğal etilüvini iç bir vaqıt tanımaz, dep bildirdi. Bu aqta Avropa Birliginiñ saytında haber etile.
Çarşenbe künü, mayısnıñ 27-de Azaq-Qara deñiz bölgesinde telükesizlikke bağışlanğan Ukraina reberliginde Avropada havfsızlıq ve işbirlik teşkilâtınıñ İşbirlik telükesizligi forumınıñ onlayn oturışı keçti. Oturışta Rusiye Qırımnı işğal etip, yarımada ve yantayğan hudud suvlarını askeriyleştirmege devam etkeni aqqında aytıldı. Bu aqta Ukraina tış işler nazirliginiñ matbuat merkezi haber etti.
"Ukraina Kongresste" mevzusındaki onlan-konferentsiyada Ukrainadaki Amerika Birleşken Devletleriniñ sabıq elçisi Con Herbst, em Ukraina akimiyeti, em de ğarp memleketleri Kreml içün Qırımnıñ mümkün olğanı qadar yüksek fiyatını saqlamalı, dep bildirdi. Onıñ sözlerine köre, suv teminatınıñ toqtatuvı şu siyasetiniñ müim qısmıdır. Bu aqta "Ukrinform" haber etti.
Bazarertesi künü, mayısnıñ 25-de NATO Parlament Assambleyasınıñ yolbaşçısı Attila Mesterhazi (Macaristan) Ukraina Yuqarı Şurasınıñ eyetinen video-körüşüvni keçiridi. Körüşüvde işğal etilgen Qırımdaki vaziyet muzakere etildi. Mesterhazi Rusiye Qırımnı işğal etkenine nisbeten Assambleyanıñ kesen-kes pozitsiyasını hatırlattı. Bu aqta Ukraina Yuqarı Şurasınıñ saytında haber etile.
Çarşenbe künü, mayısnıñ 27-de, siyasiy mabüs, Aqmescitteki ekinci "Hizb ut-Tahrir davasınıñ" iştirakçisi Bilâl Adilov 50 yaşını toldurdı. O, öz doğğan kününi Rusiyeniñ Rostov vilâyetindeki taqiqat tevqifhanesinde qayd etmege mecbur. Anda onı ve "davanıñ" başqa iştirakçilerini Rusiye akimiyeti qanunsız şekilde tuta. Qırımtatar Maaliy Merkezi can-yürekten Bilâl Adilovnı doğğan kününen hayırlay! Tezce apisten azat etilip, qorantanen qavuşmağa tileymiz! Allah baht, sabır ve sağlıq bersin!
Çarşenbe künü, mayısnıñ 27-de, siyasiy mabüs, Aqmescitteki birinci "Hizb ut-Tahrir davasınıñ" iştirakçisi Teymur Abdullayev 45 yaşını toldurdı. O, öz doğğan kününi endi dörtünci kere apiste qayd ete. Anda onı ve "davanıñ" başqa iştirakçilerini Qırımnıñ işğalci akimiyeti qanunsız şekilde tuta. Qırımtatar Maaliy Merkezi can-yürekten Teymur Abdullayevni doğğan kününen hayırlay! Tezce apisten azat etilip, qorantanen qavuşmağa tileymiz! Allah baht, sabır ve sağlıq bersin!
2014 senesi mayısnıñ 26-da işğal etilgen Qırımda "Ukraina halq evi" cemaat teşebbüsiniñ azası Timur Şaymardanov saba evden çıqıp, keri qaytmadı. Onıñ qayda ve nasıl allarda ğayıp olğanı – belli degil, şaatlar yoq. Şu sebepten em işgal etilgen Qırımda, em de Ukraina qıtasında cinaiy davalar açıldı, amma taqiqat iç bir neticege kelmedi. Ümüt etemiz ki, Timur Şaymardanov öz ailesine qaytıp kelir.
Bazarertesi künü, mayısnıñ 25-de Rostov-na-Donu şeerniñ Cenübiy bölgesiniñ arbiy mahkemesinde "Hizb ut-Tahrir davası" boyunca oturışta mabüslerniñ tayinlengen devlet advokatı koronavirusnen hastalanğanı belli oldı. Bu vaziyet siyasiy mabüsler, şu cümleden 65 yaşında Lenur Halilovnıñ yaşayışı içün telükelidir. Bu aqta "Qırım birdemligi" birleşmesi haber etti.
İşğal etilgen Qırımdan Ukrainanıñ qıta qısmına eki kere çıqmağa tırışqan Dilâver Memetovğa pasportından saifeler yırtıp çıqarılğan içün 2000 ruble para cezasını berdiler. Bu aqta "Qırım birdemligi" birleşmesi haber etti.
Şimdiki vaqıtqace Qırım Muhtar Cumhuriyetinde koronavirusnen 346 insan ve Aqyar şeerinde 155 insan hastalandı. Bu aqta Qırımnıñ "Sağlıq nazirligi" ve Aqyar "akimiyeti" saytlarında haber etile.
2016 senesi mayısnıñ 24-de işğal etilgen Bağçasarayda Dünya qırımtatar kongressi icra komitetiniñ azası Ervin İbragimov ğayıp oldı. Faalniñ babası emin ki, Ervinni Rusiye quvetçileri evelden azırlanıp, hırsızladılar. Dört yıl içinde işğalciler açqan cinaiy davada iç bir ilerilev yoq ve faal bulunğan yeri ale daa belli degil. Ümüt etemiz ki, Ervin tapılıp, öz evine, ana-babasına mıtlaqa qaytır!
İşğal etilgen Qırımda sentâbrniñ 7-de Ukraina ve Rusiye arasında keçirilgen mabüsler deñişimi çerçivesinde azat etilgen Edem Bekirovnı qıdıruvğa ilân etiller. Bu aqta "Gratı" saytında haber etile.
Ukrainadaki Amerika Birleşken Devletleriniñ elçiligi Rusiyeni işğal etilgen Qırımnıñ sakinlerini askerlikke aluv ve başqa suistimallarnı deral toqtatıp, yarımadanı Ukraina nezareti altına qaytarmağa çağırttı. Bu aqta elçiliginiñ matbuat hızmeti bildirdi.