Qırımtatar Maaliy Merkezi

Haberler

11.06.2020

İşğal etilgen Qırımda daa bir qırımtatarnı yaqaladılar

Cumaaqşamı künü, iyunniñ 11-de, işğal etilgen Qırımda Rusiyeniñ Federal havfsızlıq hızmeti Baydar köyüniñ sakini Ruslan Bekirovnı yaqaladı. Qırımtatarnı Rusiye Ceza qanunnamesiniñ 307 maddesine köre ("Bile-bile etilgen yalan şaatlıq, mütehassıs hulâsası ya da yañlış çevirme") qabaatlaylar. Bu aqta "Qırım birdemligi" birlişmesine advokat Rustem Kâmilev haber etti.

11.06.2020

Siyasiy mabüs Cemil Gafarovğa kerekli ilâclarnı bermeyler

Aqmescitteki taqiqat tevqifhanesiniñ hadimleri Aqmescitteki ekinci "Hizb ut-Tahrir davasınıñ" iştirakçisi Cemil Gafarovğa ailesi ketirgen kerekli ilâclarnen yollanmalıqnı bermege red ettiler. Bu aqta Qırımtatar Maaliy Merkezine Gafarovnıñ ömür arqadaşı Raziye bildirdi.

10.06.2020

Aqmescitteki ekinci "Hizb ut-Tahrir davasınıñ" iştirakçlerine apis müddetini uzattılar

Salı künü, iyunniñ 9-da, Qırımnıñ Yuqarı "mahkemesi" Aqmescitteki ekinci "Hizb ut-Tahrir davasınıñ" iştirakçlerine apis müddetini uzattı. Böyleliknen Yaşar Muyedinov, Servet Gaziyev, Cemil Gafarov, Osman Arifmemetov, Ruslan Suleymanov, Şaban Umerov, Rustem Seythalilov, Vladlen Abdulkadırov ve Raim Ayvazov taqiqat tevqifhanesinde sentâbrniñ 15-ce qalacaqlar.

08.06.2020

Mustafa Cemilevge qarşı açılğan "cinaiy dava" mahkemege yollandı

Sözde Rusiye Taqiqat komitetiniñ işğal etilgen Qırım boyunca Baş taqiqat idaresi qırımtatar halqınıñ lideri Mustafa Cemilevge qarşı açılğan "cinaiy davanıñ" taqiq etüvini bitirip, temelnen baqmaq içün mahkemege yolladı. Bu aqta idareniñ matbuat hızmeti bildirdi.

08.06.2020

İşğal etilgen Qırımda 623 koronavirus hastası qayd etildi

İşğal etilgen Qırım yarımadasında 623 koronavirus hastası qayd etildi. Olarnıñ arasında Qırım Muhtar Cumhuriyetinde - 446 insan ve Aqyarda - 177 insan. Bu aqta Qırımnıñ "sağlıq nazirligi" ve Aqyar "akimiyetiniñ" saytlarında haber etile.

08.06.2020

Siyasiy mabüs Oleg Prihodko kene ailesinen körüşip olamadı

İşğalciler Ukraina tarafdarı Oleg Prihodkonıñ ailesine qırğınlıq vaziyeti sebebinden mabüsnen körüşmege izin bermediler. Lâkin koronavirustan da evel olar daima faal qorantasınıñ körüşüv aqqında ricasını red ete ediler. Bu aqta Qırımtatar Maaliy Merkezine onıñ qızı Nataliya bildirdi.

05.06.2020

Ukraina Avropada Havfsızlıq ve İşbirlik Tekşilâtınıñ Yuqarı komissarını Qırım sakinleriniñ aqları bozuvına diqqat etmege çağırta

Ukraina Avropada Havfsızlıq ve İşbirlik Tekşilâtınıñ Yuqarı komissarı Lamberto Zannierni işğal etilgen Qırımda yaşağan insanlarnıñ ağır alına diqqat etmege çağırttı. Ukrainler ve qırımtatarlarğa qarşı muntazam tarzda basqı ve ayırımcılıq ötkerile ve insan aqları ciddiy şekilde bozula. Bu aqta "Ukrinform" haber agentligi yazdı.

03.06.2020

Siyasiy mabüs Ruslan Nagayevni ceza kamerasında tutalar

"Hizb ut-Tahrir davasınıñ" iştirakçisi Ruslan Nagayev işğal etilgen Qırımdan Rostov-na-Donu şeerindeki apishanesine alıp ketirilgen soñ, 5 künge ceza kamerasına qoyuldı. Bu aqta "Qırım birdemligi" birleşmesi haber etti.