Bağçasaraydaki "Hizb ut-Tahrir davasınıñ" iştirakçisi Marlen Asanovnıñ sağlığı fenalaştı. Mabüs tış ağrısı ve büyrek yanğısına şikâyet ete. Bundan ğayrı onda varikoz hastalığı peyda oldı. Bu aqta Qırımtatar Maaliy Merkezine Asanovnıñ ömür arqadaşı Ayşe Asanova haber etti.
Bazarertesi künü, iyunniñ 22-de işğal etilgen Qırımnıñ "yolbaşçısı" Sergey Aksönov, martnıñ 17-de çıqarılğan yüksek azırlıq rejimine dair fermanına deñişmelerni kirsetti. Böyleliknen Qırımda kütleviy tedbirlerni ötkermege yasaq ğalebe arbiy numayışına nisbeten qullanılmaycaq. Bu aqta Qırım "akimiyeti" saytında haber etile.
Ukraina Yuqarı Şurasınıñ insan aqları vekâletlisi Lüdmila Denisova "Söz serbestligi ve onıñ başqa temelli serbestliklernen bağı" birinci sessiyasında, Ukraina jurnalistleri milliy birliginiñ malümatına köre, soñki 5 yıl devamında Qırımda jurnalistlerge qarşı basqınıñ 300-den ziyade adisesi qayd etildi, 10 cemaat jurnalisti qanunsız şekilde apiske alındı, dep bildirdi. Bu aqta ombudsmen Facebooktaki saifesinde haber etti.
Birleşken Milletlerdeki Ukraina eyeti, Jenevada ötkerilgen BM insan aqları şurasınıñ 43-cı sessiyasında Qırımnıñ işğalci akimiyetiniñ vekiline söz berilgeni munasebetinen qatiy narazılıq bildirdi. Böyle şekilde Rusiye Qırım yarımadasınıñ ilhaqını qanuniyleştirmege tırışa. Bu aqta Ukraina eyetiniñ matbuat hızmeti Twitterde haber etti.
Bazarertesi künü, iyünniñ 22-de, siyasiy mabüs, Aqmescitteki ekinci "Hizb ut-Tahrir davasınıñ" iştirakçisi Rustem Şeyhaliyev 41 yaşını toldurdı. O, öz doğğan kününi Rusiyeniñ Rostov vilâyetindeki taqiqat tevqifhanesinde qayd etmege mecbur. Anda onı ve "davanıñ" başqa iştirakçilerini Rusiye akimiyeti qanunsız şekilde tuta. Qırımtatar Maaliy Merkezi can-yürekten Rustem Şeyhaliyevni doğğan kününen hayırlay! Tezce apisten azat etilip, qorantanen qavuşmağa tileymiz! Allah baht, sabır ve sağlıq bersin!
"Süyreklengen" deñiz işğali devam etile, çünki Rusiye Birleşken Milletlerniñ deñiz uquqı boyunca Konventsiyasını bozıp, Ukraina suvları ve Keriç boğazında gemiler qatnavına mania ola. Bu aqta halqara uquqçı Bogdan Ustimenko Facebooktaki saifesinde bildirdi.
Rusiyede, Prezident memuriyetiniñ binası yanında qırımtatarlarğa qol tutıp bir kişilik piketlerni ötkergen üç faal: Yekaterina Bajanova, Karine Kovhayeva ve Kirill Şişkanovnı yaqaladılar. Bu aqta aq qorçalayıcı sayt "OVD-info" haber etti.
Cumaaqşamı künü, iyünniñ 18-de "Strategiya-18" Rusiye teşebbüsiniñ iştirakçileri Qırımnıñ işğalden azat etilüvi oğrunda ve ukrain siyasiy mabüslerge qoltutmaq içün bir kişilik piketler ötkerdiler. Olar qollarında "Qırımtatarlarnıñ soyqırımını toqtatmaq", "Yuqunç keter – basqı qalır", "Gibrid sürgünlik – qırımtatarlarnıñ yañı soyqırımı", "Qırım – bu Ukraina" degen yazuvlı şiarlarnı tuta ediler. Bu aqta aktsiya iştirakçileri öz Facebook saifesinde haber ettiler.
Viyanada ötkerilgen Avropada Havfsızlıq ve İşbirlik Teşkilâtı Daimiy şurasınıñ oturışında Amerika Birleşken Devletleriniñ elçisi Ceyms Gilmor, ABD işğal etilgen Qırımda Ruslan Bekirovnı yalan şaatlıq berüvinde qabaatlap oña qarşı "cinaiy dava" açılğanını takbih eteler dep bildirdi.
Cuma künü, iyünniñ 19-da, siyasiy mabüs, Aqmescitteki ekinci "Hizb ut-Tahrir davasınıñ" iştirakçisi Tofik Abdulgaziyev 39 yaşını toldurdı. O, öz doğğan kününi Rusiyeniñ Rostov vilâyetindeki taqiqat tevqifhanesinde qayd etmege mecbur. Anda onı ve "davanıñ" başqa iştirakçilerini Rusiye akimiyeti qanunsız şekilde tuta. Qırımtatar Maaliy Merkezi can-yürekten Tofik Abdulgaziyevni doğğan kününen hayırlay! Tezce apisten azat etilip, qorantanen qavuşmağa tileymiz! Allah baht, sabır ve sağlıq bersin!
Ukrainadaki Amerika Birleşken Devletleriniñ elçihanesi, bir qaç ukrain siyasiy mabüsi qanunsız şekilde tutılğan Rusiyeniñ taqiqat tevqifhanesinde COVID-19 qırğınlığınıñ tez tarqaluvı sebebinden raatsızlığını ifadeledi. ABD nevbetteki kere Rusiyeni bütün ukrain siyasiy mabüslerni azat etmege çağırttı. Bu aqta elçihane Twitterdeki saifesinde bildirdi.
Cumaaqşamı künü, iyunniñ 18-de, Avropa Birliginiñ Şurası Rusiyege qarşı Qırımnı işğal etken içün sıñırlavlarnı 2021 senesi iyün ayına qadar uzattı. Bu aqta Ukraina Tış işler naziri Dmitriy Küleba Twitterdeki saifesinde yazdı.
Aqmescitteki ekinci "Hizb ut-Tahrir davasınıñ" iştirakçisi Cemil Gafarovnıñ advokatı Rifat Yahin yanvar ayından başlap ekinci gruppa saqatı olğan siyasiy mabüs taqiqat tevqifhanesinde nasıl şaraitte tutılğanına dair vesiqalarnı alıp olamay. Bu aqta advokat Telegramdaki saifesinde bildirdi.
İşğal etilgen Qırımda koronavirus hastalığı sebebinden 20 insan öldi. Umumen yarımadada 770 koronavirus hastası qayd etildi. Bu aqta Qırımnıñ "sağlıq nazirligi" saytında haber etile.
Çarşenbe künü, iyunniñ 17-de, Birleşken Milletlerniñ insan aqları şurasınıñ 43-cı sessiyasında Ukraina eyeti halqara toplulıqnı Qırımtatar Milliy Meclisiniñ faaliyeti yasaq etilgen içün Rusiyege qarşı basıqını quvetleştirmege çağırttı. Rusiye, Birleşken Milletlerniñ Halqara mahkemesiniñ qararını körmemezlikke urıp, Qırımnıñ tamır halqına nisbeten basqı siyasetini devam ete. Bu aqta Ukraina Tış işler nazirliginiñ matbuat hızmeti haber etti.
Aqmescitteki "Hizb ut-Tahrir davasınıñ" iştirakçileri Teymur Abdullayev ve Ayder Saledinovğa qarşı apishanede basqı devam etile. Siyasiy mabüslerni boysundırmaq içün, daima ceza kamerasında deşetli şaraitte tutalar. Bu aqta advokat Emil Kurbedinov öz Facebooktaki saifesinde haber etti.
Bazarertesi künü, iyunniñ 15-de, Qırımtatar Maaliy Merkezi idaresiniñ yolbaşçısı, Qırımtatar Milliy Meclisiniñ azası Eskender Bariyev ve Qırımtatar Maaliy Merkeziniñ idarecisi Lüdmila Korotkih videokonferans şekilde Ukraina prezidentiniñ "2015 senesi avgustnıñ 25-de imzalanğan № 501/2015 "İnsan aqları boyunca milliy strateji qabul etilüv aqqında" Ukraina prezidentiniñ fermanına deñişüvler kirsetilüvi aqqında" fermanınıñ leyhasını işlep çıqarğan taqımınıñ oturışında iştirak ettiler. Qırımtatar Maaliy Merkeziniñ vekilleri leyhanıñ "Tamır halqları ve milliy azlıqlarınıñ aqlarını teminlev" qısmına bir qaç teklif kirsettiler.
Rusiyeniñ Tış işler nazirligi Kiyevdeki Rusiye elçihanesi ögünde ötkerilgen "Rusiye künü – işğalci künü" tınç aktsiyağa qarşılıq kösterdi. Nazirlikte şu tedbirni "nevbetteki Rusiyege qarşı olğan marifet" adlandırıp, aktsiyaniñ icadiy şekilde yapılğanını tanıdılar.
Cuma künü, iyunniñ 12-de, Ukraina akimiyeti nevbetten tış oturışında Ukraina Yuqarı Şurasınıñ devletniñ vilâyetlerinde, şu cümleden Qırım Muhtar Cumhuriyetinde, rayonlarnı yoq etüv ve meydanğa ketirüv aqqında qarar leyhasına qol tuttı. Bu aqta Ukraina akimiyetiniñ matbuat hızmeti haber etti.
Cuma künü, iyunniñ 12-de, Kiyevdeki Rusiye elçihanesi ögünde "Rusiye künü – işğalci künü" adlandırılğan tınç aktsiya ötkerildi. Faaller icadiy şekilde bütün dünyağa Rusiyeniñ işğalci olğanını hatırlattılar. Elçihaneniñ binası çeşit tillerde işğalci devletniñ tecavuziy tış siyaseti mevzusındaki resimler ve yazılarnen yarıqlandı.