Qırımtatar Maaliy Merkezi

Haberler

29.05.2020

Rusiye Tış işler nazirligi qırımtatar halqı soyqırımnıñ qurbanları hatırasına bağışlanğan halqara matem onlayn-mitingine qarşılıq kösterdi

Rusiye Tış işler nazirligi, mayısnıñ 18-de Türkiye Cumhuriyetiniñ memurları ve qırımtatar diasporasınıñ temsilcileri ile ötkerilgen qırımtatar halqı soyqırımnıñ 76 yıllığına bağışlanğan halqara matem onlayn-mitingine qarşılıq kösterdi. Nazirlik öz beyanatında sanki facianıñ ahlâqsız şekilde qullanuvını qayd etip, mitingde Qırımğa nisbeten Stalin rejiminiñ basqısı şimdiki Rusiyeniñ siyasetinen qıyaslanğan içün öz raatsızlığını bildirdi.

29.05.2020

Avropa Birligi Qırım işğalini iç bir vaqıt tanımaz - Borrell

Avropa Birliginiñ tış işleri ve havfsızlıq siyaseti boyunca Yuqarı temsilcisi Josep Borrell, Avropa Birligi Ukrainanıñ mustaqilligi ve hudud bütünligine qol tutıp, Rusiye tarafından Qırımnıñ işğal etilüvini iç bir vaqıt tanımaz, dep bildirdi. Bu aqta Avropa Birliginiñ saytında haber etile.

28.05.2020

Ukraina ilk kere Avropada havfsızlıq ve işbirlik teşkilâtında Azaq-Qara deñiz bölgesiniñ meselesini köterdi

Çarşenbe künü, mayısnıñ 27-de Azaq-Qara deñiz bölgesinde telükesizlikke bağışlanğan Ukraina reberliginde Avropada havfsızlıq ve işbirlik teşkilâtınıñ İşbirlik telükesizligi forumınıñ onlayn oturışı keçti. Oturışta Rusiye Qırımnı işğal etip, yarımada ve yantayğan hudud suvlarını askeriyleştirmege devam etkeni aqqında aytıldı. Bu aqta Ukraina tış işler nazirliginiñ matbuat merkezi haber etti.

28.05.2020

Kreml içün Qırımnıñ mümkün olğanı qadar yüksek fiyatını saqlamalımız - Herbst

"Ukraina Kongresste" mevzusındaki onlan-konferentsiyada Ukrainadaki Amerika Birleşken Devletleriniñ sabıq elçisi Con Herbst, em Ukraina akimiyeti, em de ğarp memleketleri Kreml içün Qırımnıñ mümkün olğanı qadar yüksek fiyatını saqlamalı, dep bildirdi. Onıñ sözlerine köre, suv teminatınıñ toqtatuvı şu siyasetiniñ müim qısmıdır. Bu aqta "Ukrinform" haber etti.

27.05.2020

NATO, Rusiye Qırımnı işğal etkenine nisbeten öz qatiy pozitsiyasını hatırlattı

Bazarertesi künü, mayısnıñ 25-de NATO Parlament Assambleyasınıñ yolbaşçısı Attila Mesterhazi (Macaristan) Ukraina Yuqarı Şurasınıñ eyetinen video-körüşüvni keçiridi. Körüşüvde işğal etilgen Qırımdaki vaziyet muzakere etildi. Mesterhazi Rusiye Qırımnı işğal etkenine nisbeten Assambleyanıñ kesen-kes pozitsiyasını hatırlattı. Bu aqta Ukraina Yuqarı Şurasınıñ saytında haber etile.

27.05.2020

Siyasiy mabüs Bilâl Adilov 50 yaşını toldurdı

Çarşenbe künü, mayısnıñ 27-de, siyasiy mabüs, Aqmescitteki ekinci "Hizb ut-Tahrir davasınıñ" iştirakçisi Bilâl Adilov 50 yaşını toldurdı. O, öz doğğan kününi Rusiyeniñ Rostov vilâyetindeki taqiqat tevqifhanesinde qayd etmege mecbur. Anda onı ve "davanıñ" başqa iştirakçilerini Rusiye akimiyeti qanunsız şekilde tuta. Qırımtatar Maaliy Merkezi can-yürekten Bilâl Adilovnı doğğan kününen hayırlay! Tezce apisten azat etilip, qorantanen qavuşmağa tileymiz! Allah baht, sabır ve sağlıq bersin!

27.05.2020

Dörtünci doğğan künü apiste: siyasiy mabüs Teymur Abdullayev 45 yaşını toldurdı

Çarşenbe künü, mayısnıñ 27-de, siyasiy mabüs, Aqmescitteki birinci "Hizb ut-Tahrir davasınıñ" iştirakçisi Teymur Abdullayev 45 yaşını toldurdı. O, öz doğğan kününi endi dörtünci kere apiste qayd ete. Anda onı ve "davanıñ" başqa iştirakçilerini Qırımnıñ işğalci akimiyeti qanunsız şekilde tuta. Qırımtatar Maaliy Merkezi can-yürekten Teymur Abdullayevni doğğan kününen hayırlay! Tezce apisten azat etilip, qorantanen qavuşmağa tileymiz! Allah baht, sabır ve sağlıq bersin!

26.05.2020

Timur Şaymardanov qayda? 6 yıl evel ğayıp olğan faal aqqında ale daa iç bir malümat yoq

2014 senesi mayısnıñ 26-da işğal etilgen Qırımda "Ukraina halq evi" cemaat teşebbüsiniñ azası Timur Şaymardanov saba evden çıqıp, keri qaytmadı. Onıñ qayda ve nasıl allarda ğayıp olğanı – belli degil, şaatlar yoq. Şu sebepten em işgal etilgen Qırımda, em de Ukraina qıtasında cinaiy davalar açıldı, amma taqiqat iç bir neticege kelmedi. Ümüt etemiz ki, Timur Şaymardanov öz ailesine qaytıp kelir.

25.05.2020

Siyasiy mabüslerniñ tayinlengen devlet advokatı koronavirusnen hastalandı

Bazarertesi künü, mayısnıñ 25-de Rostov-na-Donu şeerniñ Cenübiy bölgesiniñ arbiy mahkemesinde "Hizb ut-Tahrir davası" boyunca oturışta mabüslerniñ tayinlengen devlet advokatı koronavirusnen hastalanğanı belli oldı. Bu vaziyet siyasiy mabüsler, şu cümleden 65 yaşında Lenur Halilovnıñ yaşayışı içün telükelidir. Bu aqta "Qırım birdemligi" birleşmesi haber etti.

24.05.2020

4 yıl evel işğal etilgen Qırımda Ervin İbragimov hırsızlandı

2016 senesi mayısnıñ 24-de işğal etilgen Bağçasarayda Dünya qırımtatar kongressi icra komitetiniñ azası Ervin İbragimov ğayıp oldı. Faalniñ babası emin ki, Ervinni Rusiye quvetçileri evelden azırlanıp, hırsızladılar. Dört yıl içinde işğalciler açqan cinaiy davada iç bir ilerilev yoq ve faal bulunğan yeri ale daa belli degil. Ümüt etemiz ki, Ervin tapılıp, öz evine, ana-babasına mıtlaqa qaytır!

18.05.2020

Soyqırımnıñ qurbanlarını ilk kere halqara seviyede añdılar (mitingniñ videosı)

Bazarertesi künü, mayısnıñ 18-de ilk kere qırımtatar halqı soyqırımnıñ qurbanları hatırasına bağışlanğan matem mitingi halqara seviуede keçirildi. Onlayn-miting bütün dünyağa yayınlandı. Qırımtatarlarnen birdemlikni köstermek içün merasimge Kanada parlamenti, Litvaniya seymi, Türkiye prezidenti, Ukraina tış işler nazirliginiñ vekilleri, faaller, siyasetçiler, elçiler ve bütün dünya boyunca qırımtatar ve ukrain diasporalarınıñ temsilcileri qoşuldılar.