Ukraina prezidenti Volodımır Zelenskıy ''Fokus'' matbuat vastasına bergen intervyusında işğalcilerniñ yarımadadan ücümi ete bilgenlerini, ''Büyük cenk olacaq'', dep izaatladı. Amma, suv qıtlığına baqmadan, Rusiye areketke keçmeycegine inana.
Qırımtatar Maaliy Merkezi idaresiniñ yolbaşçısı, Qırımtatar Milliy Meclisniñ azası Eskender Bariyev ''Qırım.Aqiqat'' matbuat vastasına bergen izaatında RF Qırımğa qanunsız şekilde öz vatandaşlarını köçürmege devam etkenini qayd etti. Aynı vaqıtta yarımadada işğalden evel yaşağan sakinlerniñ sayısı eksile.
İlk qış ay 24 kününiñ sabası itibarınen vaqtınca işğal etilgen Qırımda ve Aqyar şeerinde tacmaraz hastalığına daa 436 kişi oğrağan. Ağımdaki yılnıñ başından berli Qırımda 28 993 kişiniñ bu hastalıqqa oğrağanı aqqında bellidir.
Litva çetel işler Nazirligi Rusiye Federatsiyasından, bundan evel koronavirus hastalığına oğrağanına baqmadan, kene ŞİZO-ğa yollanılğan Aqmescitteki ''Hizb ut Tahrir davasınıñ'' iştirakçisi Teymur Abdullayevge tıbbiy yardımnıñ berilmesini talap ete. Bu aqta müessiseniñ Twitterdeki matbuat hızmeti haber ete.
Qırımtatar Maaliy Merkeziniñ taqımı, Qırım siyasiy mabuslarına bağışlap, ingliz tilinde derc etken kitapçığını yañılattı. Kitapçıqta Qırım ve Rusiye topraqlarında taqiqat izolâtorında ya da koloniyalarda tutulğan 143 mabus ve şartlı müddet ile cezalanğan ya da sıñırlanğan vatandaşlarımız aqqında (doğğan künü, yaşağan şeeri, faaliyeti, yaqalanğan künü, yaqalanuvnıñ sebebi, qabaatlav, cemaatnıñ/aqrabalarınıñ bu aqta fikirleri ya da siyasiy mabusnıñ soñki sözü kibi) malümatlar toplanğandır. Qayd etilgen malümatlar cinaiy ''davalarğa'' köre tasnif etilgendir. Kitapçıq "Fridrih Naumann Azatlıq fondunıñ" Ukrainada vekilliginiñ qol tutuvı ile azırlanğandır.
Aqmescitteki ekinci ''Hizbut-Tahrir davası'' iştirakçileriniñ cemisi yaqın vaqıtta işğal etilgen Qırımdan Rostov-na-Donu şeerine avuştırılacaqlar. Qara qış ayında ''dava'' boyunca ilk mahkeme oturışuvlarnıñ keçirilüvi beklenile. Bu aqta ''Qırım birdemligi'' haber etti.
Bahçisaraydaki ekinci ''Hizbut-Tahrir davasınıñ'' iştirakçileriniñ cemisi Rostov-na-Donu şeerindeki 5 sanlı taqiqat izolâtorından Novoçerkassk şeeriniñ 3 sanlı taqiqat izolâtorına avuştırıldı. Bu aqta Qırımtatar Maaliy Merkezine siyasiy mabus Server Mustafayevniñ ömür arqadaşı Maye haber etti.
Çarşembe künü, ilk qış ayınıñ 23-de, ''devlet qabaatlavı'' «Hizb ut-Tahrir davasınıñ» iştirakçileri Enver Omerov, Riza Omerov ve Ayder Capparov içün sert rejimli koloniyada qalmasınen 13 yıldan 19 yılğa qadar apis cezalarını talap etti.
İşğal etilgen Qırımda ve Aqyar şeerinde tacmaraz salğını darqalmağa başlanğanından berli işbu hastalıqtan cemi olaraq 651 kişi vefat etken. Al-azırda yarımadada 28 577 kişiniñ bu hastalıqqa oğrağanı aqqında bellidir.
Rusiye Federatsiyası işğal etilgen Qırımda mustaqil Ukraina matbuat vastalarınıñ yayınlanuvına muntazam şekilde keder ete: yarımadanıñ şimalindeki 19 mesken yerden ukrain stantsiyaları tek 7-de eşitile. Bu aqta Qırım aq qorçalayıcı gruppası haber ete.
Aqmescitteki ''Hizb ut-Tahrir davasınıñ'' iştirakçisi Teymur Abdullayevnı, bundan evel o, tacmaraz hastalığına oğrağanına baqmadan, ŞİZOğa avuştırğanlar. Bu aqta siyasiy mabusnıñ anası Dilâra Abdullayeva öz Facebook saifesinde haber etti.
Ukraina sıñır hızmeti Herson sıñır bölüginiñ matbuat kâtibi İvan Şevtsov ''Qırım.Aqiqat'' matbuat vastasına bergen izaatında, Qırım sakinleri müddeti bitken pasportları esasında vesiqalarını yañılatmaq maqsadınen Ukrainanıñ qıtasına keçe bileceklerini haber etti.
Bazarertesi künü, ilk qış ayınıñ 21-de, RF Cenübiy arbiy mahkemesi ukrainalı siyasiy mabusları Enver Omerov, Riza Omerov, Ayder Capparovnıñ imayesinden 10 şaatnı sorğulamaq talabını red etti. Bundan ğayrı, mahkeme işbu ''dava'' boyunca taqiqatını yekünledi. Bu aqta ''Qırım birdemligi'' haber etti.
İlk qış ay 22 kününiñ sabası itibarınen vaqtınca işğal etilgen Qırımda ve Aqyar şeerinde tacmaraz hastalığına daa 436 kişi oğrağan. Ağımdaki yılnıñ başından berli Qırımda 28 121 kişiniñ bu hastalıqqa oğrağanı aqqında bellidir.
Salı künü, ilk qış ayınıñ 22-de, Sudaq şeerinde Rusiye polisleri, bundan evel RF Yuqarı mahkemesiniñ binası yanında yaqalanğan faal Kamilovnıñ evine keldiler. Quvetçiler, qanunsız alda yaşağanlarnı'' qıdırğanlarını iddia eteler. Bu aqta ''Qırım birdemligi'' haber etti.
Bazarertesi künü, ilk qış ayınıñ 21-de, Qırımnı işğalden azat etüv ve qırımtatar halqı ile birdemlik oğrunda teşkil etilgen #LIBERATECRIMEA halqara areketiniñ faalleri bundan evel ilân etilgen ''Deputat, Kreml mabuslarına yardım et!'' leyhasınıñ ilk neticeleri ve ilerilemesi aqqında haber ettiler. İşbu leyha Rusiye işğalcileri tarafından yaqalanğan ya da taqip etilgen qırımlılarnı Ukraina halq deputatlarınıñ imayesi altına alınmasını maqsad etip qoyğandır. Tedbirde Ukraina halq deputatları, siyasiy mabuslarnıñ tuvğanları, aq qorçalayıcılar ve Ukraina Yuqarı Şurasınıñ insan aqları boyunca Vekâletlisi qoşuldılar.
Cuma künü, ilk qış ayınıñ 18-de, Qırımtatar Maaliy Merkezi idaresiniñ yolbaşçısı, Qırımtatar Milliy Meclisniñ azası Eskender Bariyev ''İşğal etilgen topraqlarda siyasiy ve diniy sebeplerden taqip etüv. Meselege tesir etüv ve çezüv yolları'' mevzusında tögerek masada iştirak etti. Muzakere etüv esnasında o, RF işğal etilgen Qırımda insanlarnıñ diniy inançları ve muhalefet ile küreşini devam etkenini qayd etti. Bariyev, ukrain siyasiy mabuslarına ''Deputat, Kreml mabuslarına yardım et'' leyhasında iştirak etip, vatandaşlarımıznı qorçalamağa çağırdı.
Bazartesi künü, ilk qış ayınıñ 21-de, saat 15:00-te Qırımnı işğalden azat etüv ve qırımtatar halqı ile birdemlik oğrunda teşkil etilgen #LIBERATECRIMEA halqara areketiniñ faalleri, Ukraina deputatlarını Rusiye işğalcileri tarafından apis etilgen ya da taqip etilgen Qırım sakinlerine atalıq yapmağa çağırğan ''Deputat, Kreml mabuslarına yardım et!'' leyhasınıñ ara neticeleri ve ilerilemesi ile paylaşacaqlar. Tedbir Zoom platformasında https://cutt.ly/chLzwCm. bağlantısı boyunca onlayn şekilde keçirilecektir. İstegi olğan er kesni tedbirge qoşulmağa, Qırım ve Rusiye apishanelerinde ve SİZO-larında tutulğan vatandaşlarımıznen birdemligimizni numayış etmege davet etemiz.
İlk qış ay 18 kününiñ sabası itibarınen vaqtınca işğal etilgen Qırımda ve Aqyar şeerinde tacmaraz hastalığına daa 436 kişi oğrağan. Ağımdaki yılnıñ başından berli Qırımda 26 377 kişiniñ bu hastalıqqa oğrağanı aqqında bellidir.
Ukrainanıñ Rostov-na-Donu şeerindeki Baş konsulı Taras Malışevskiy Rusiye tevqifhanelerindeki ukrain siyasiy mabuslarını ziyaret etti. O, Rustem Abiltarov, Zevri Abseyitov ve Aleksey Bessarabov ile körüşti. Bu aqta ''Qırım birdemligi'' haber etti.