Qırımtatar Maaliy Merkezi

Haberler

08.12.2020

Ekinci doğğan künü qafeste: ''Hizb ut-Tahrir davasınıñ'' iştirakçisi Lenur Halilov 53 yaşını toldurdı

Salı künü, ilk qış ayınıñ 8-de, siyasiy mabus, ''Hizb ut-Tahrir davasınıñ'' iştirakçisi Lenur Halilov 53 yaşını toldurdı. O, Qırımnıñ işğalci akimiyeti tarafından tevqifhanede qapatılıp, doğğan kününi mında ekinci kere qayd etmege mecbur. Qırımtatar Maaliy Merkeziniñ hadimleri Lenur Halilovnı can-yürekten doğğan künü ile hayırlay! Oña eñ yaqın vaqıtta azat etilmekni, qorantasına qavuşmaqnı, qaviy sağlıq, sarsılmaz irade ve bereket tileyimiz!

07.12.2020

İşğalciler Qırımda nevbetteki arbiy talimatlarını keçirdiler

Bazartesi künü, ilk qış ayınıñ 7-de, tacmaraz salğını darqalğanına baqmadan, işğal etilgen Qırımda nevbetteki qanunsız arbiy talimatlar keçirildi, işbu talimatlar esnasında uçucılar adiy ve mürekkep uçuv vazifelerini becerdiler. Bu aqta RF Cenübiy arbiy bölüginiñ matbuat hızmeti haber etti.

04.12.2020

Ekspertler ''Qırım platformasınıñ'' hususiyetlerini ve vazifelerini muzakere ettiler

Cuma künü, ilk qış ayınıñ 4-de, Qırımtatar Maaliy Merkezi "Fridrih Naumann adına Azatlıq fondunıñ" Ukrainada vekilliginiñ qol tutuvı ile Qırım munaqaşalar klubınıñ XVII toplaşuvını ötkerdi. Tedbir çerçivesinde ekspertler ''Qırım platformasınıñ'' peyda oluv sebeplerini, çağıruvlarını, telükelerini ve hususiyetlerini, platformanıñ faaliyetini teşviq etmek maqsadınen cemaat, uquq qorçalav ve ilmiy teşkilâtlarnıñ vazifelerini muzakere ettiler. Muzakere etüvniñ neticeleri esasında Qırımtatar Maaliy Merkezi Ukraina akimiyeti, hususan Ukraina çetel işler Nazirlgi içün mütenasip tevsiyelerini azırlaycaqtır.

04.12.2020

Siyasiy mabus Seytmemetov mahsus blokka keçirildi

Bahçisaraydaki üçünci "Hizb ut-Tahrir davasınıñ'' iştirakçisi Rustem Seytmemetov Rusiyeniñ Rostov-na-Donu şeerindeki tevqifhaneniñ mahsus blokuna ''vaqtınca'' keçirildi. Bu aqta ''Qırım birdemligi'' haber ete.