Qırımtatar Maaliy Merkezi

Haberler

11.12.2020

#LIBERATECRIMEA faalleri Ukraina halq deputatlarını Kreml mabuslarına atalıq yapmağa çağıralar

Cuma künü, ilk qış ayınıñ 11-de, Qırımnı işğalden azat etüv ve qırımtatar halqı ile birdemlik oğrunda teşkil etilgen #LIBERATECRIMEA halqara areketi ''Deputat, Kreml mabuslarına yardım et'' leyhasını onlayn şekilde taqdim etip, Ukraina deputatlarını Rusiye işğalcileri tarafından apis etilgen ya da taqip etilgen Qırım sakinlerine atalıq yapmağa çağırdılar. Tedbirge sabıq siyasiy mabuslar, Ukraina halq deputatları, Qırımtatar Milliy Meclisiniñ azaları, aq qorçalayıcılar, faaller ve jurmalistler qoşuldılar.

11.12.2020

Aqmescitteki ekinci ''Hizb ut-Tahrir davası'' iştirakçileriniñ apis müddetleri uzatıldı

Cuma künü, ilk qış ayınıñ 11-de, işğal etilgen Qırımnıñ Yuqarı ''mahkemesi'' Aqmescitteki ekinci ''Hizb ut-Tahrir davası'' iştirakçileriniñ apis müddetlerini uzattı. Alim Karimov, Rustem Şeyhaliyev, Erfan Osmanov, Osman Arifmemetov, Mecit Abdurahmanov, İzzet Abdullayev, Vladlen Abdulkadırov ve Ruslan Suleymanov taqiqiy izolâtorında 2021 senesi qara qış ayınıñ 14-nece qalacaqlar.

10.12.2020

Bügün Halqara insan aqları Künü qayd etile

Cumaaqşamı künü, ilk qış ayınıñ 10-da, bütün dünyada Halqara insan aqları Künü qayd etile - 1948 senesi aynı bu künü BM Baş assambleyasınıñ üçünci oturışuvında Umumiy insan aqları beyannamesi, yani bütün insanlarnıñ saip olğan aqlarnı belgilegen vesiqa qabul etildi. Bügün vaqtınca işğal etilgen Qırımda insan aqları saasında vaziyetniñ kün-künden beterleşkenini hatırlatmaq kerekmiz. BM teşkilâtınıñ insan aqları saasında ''İnsan aqlarını qorçalañız'' degen çağıruvğa riayet etip, Qırımda insan aqlarınıñ bozuluvı ve qorçalanması meselesini daimiy şekilde kün tertipte tutmağa çağıramız.

10.12.2020

Lenur İslâmov ğıyabiy şekilde 19 yıllıq apis cezasına maküm etildi

Cumaaqşamı künü, ilk qış ayınıñ 11-de, işğal etilgen Qırımnıñ Yuqarı ''mahkemesi'' ''ATR'' qırımtatar telekanalınıñ saibi Lenur İslâmovnı ğıyabiy şekilde qattı tertipli koloniyada 19 yıllıq apis cezasına maküm etti ve oña 2 yıl devamında informatsion faaliyetnen oğraşmaqnı yasaq etti. Bu aqta ''İnterfaks'' agentligi haber etti.

09.12.2020

''Deputat, Kreml mabuslarına yardım et'': #LIBERATECRIMEA Qırım siyasiy mabuslarına qol tutuv leyhasını başlattı

Qırımnı işğalden azat etüv ve qırımtatar halqı ile birdemlik oğrunda teşkil etilgen #LIBERATECRIMEA halqara areketi ''Atalıq'' halqara leyhası çerçivesinde ''Deputat, Kreml mabuslarına yardım et'' leyhasını başlap, Ukraina deputatlarını Rusiye işğalcileri tarafından apis etilgen ya da taqip etilgen Qırım sakinlerine qol tutmağa çağıra. Leyha Halqara insan aqları künü munasebetinen cuma künü, ilk qış ayınıñ 11-de, saat 17:00-den 18:00-gece Zoom platformasında https://cutt.ly/PhE8h8H bağlantısı boyunca taqdim etilecektir. İstegi olğan er kesni tedbirge qoşulmağa, Qırım ve Rusiye apishanelerinde ve SİZO-larında tutulğan vatandaşlarımıznen birdemligimizni numayış etmege davet etemiz.