70 mahkeme oturışuvından soñ Bahçisaraydaki ''Hizb ut-Tahrir davasınıñ” iştirakçisi Timur İbragimov ömür arqadaşınen körüşe bildi. Siyasiy mabusnıñ sırtı ve qolu ağırmağa devam ete. Bu aqta Qırımtatar Maaliy Merkezine onıñ ömür arqadaşı Dilâra haber etti.
Çarşembe künü, boş aynıñ 18-de, COVİD-19 ile kureş boyunca operativ ştabnıñ oturuşuvında vaqtınca işğal etilgen Qırım boyunca Rospotrebnadzor başlığı Nataliya Penkovska yarımadada hastalıqnıñ qattı sürette artqanını qayd etti. Onıñ fikirince, qoşma sıñırlayıcı tedbirlerni amelge keçirmek kerektir.
Boş ay 18 kününiñ sabası itibarınen vaqtınca işğal etilgen Qırımda ve Aqyar şeerinde tacmaraz hastalığına daa 268 kişi oğrağan. Ağımdaki yılnıñ başından berli Qırımda 16369 kişiniñ bu hastalıqqa oğrağanı aqqında bellidir.
Sağlıq vaziyeti yaramay (sıcağı, öksürügi, zayıflığı) olğanına baqmadan, Aqmescitteki ''Hizb ut-Tahrir davasınıñ” iştirakçisi Teymur Abdullayev ŞİZO-da tutula. Oña tıbbiy yardım berilmey. Bu aqta siyasiy mabusnıñ anası Dilâra Abdullayeva öz Facebook saifesinde haber etti.
Qırım yarımadasında suv menbalarınıñ qıtlığı meselesi 2020 senesiniñ qurğaq yazından soñ bir çoq matbuat vastalarında eali içün suv yetmegeni ve suv anbarları quruğanı aqqında haberler peyda olğanınen özüne büyük diqqat celp etti. Vaziyetni, onıñ kölemini ve sebeplerini talil etmek maqsadınen Qırımtatar Maaliy Merkeziniñ ekspertleri açıq satellit malümatlarını işlettiler. Jurnalistlerni ve bütün aves etken insanlarnı Qırımnıñ suv menbalarını satellitten yapılğan resimler vastasınen nezaret etüvniñ neticelerini cuma künü, boş aynıñ 20-de saat 11:00-de Zoom platformasında (aşağıdaki bağlantı boyunca evelden qayd etilip) taqdim etüvge davet etemiz. Tedbir Qırımtatar Maaliy Merkeziniñ Facebooktaki saifesinde de yayınlanacaqtır.
Qırım MC Prokuraturası halqara uçaq seferleri qaidelerini ve işğal etilgen Qırımğa kiriş-çıqış tertibini bozğan 44 uçaqlarğa dair cinaiy dava açıp, mahkemeden olarnıñ apis etilmesini talap etti. Bu aqta müessiseniñ matbuat hızmeti haber ete.
Rusiye istimal nezaretiniñ yolbaşçısı Anna Popova Qırımda tacmaraz hastalığı seviyesi pek yüksek olğanını bildirdi. Bu aqta TASS haber agentligi haber etti.
İşğal etilgen Aqmescitteki demiryol rayon mahkemesi ''Veciye Kaşka davasınıñ” iştirakçisi Kâzim Ametovnıñ tevqifhanede insaniyetsiz ve aşalayıcı şaraitlerge şikâyetini baqmağa başladı. Bu aqta ''Qırım birdemligi'' haber ete.
Boş ay 17 kününiñ sabası itibarınen vaqtınca işğal etilgen Qırımda ve Aqyar şeerinde tacmaraz hastalığına daa 209 kişi oğrağan. Ağımdaki yılnıñ başından berli Qırımda 16101 kişiniñ bu hastalıqqa oğrağanı aqqında bellidir.
Bazarertesi künü, boş aynıñ 16-da, matbuat vastalarınıñ serbestligi İttifağı aza memleketleriniñ nazirleri seviyesinde körüşüvi esnasında Ukraina çetel işler naziriniñ birinci muavini Emine Caparova işğal etilgen Qırımda jurnalistlerniñ cezalavlarğa oğrağanı aqqında ikâye etip, olarnıñ azat etilmesi içün halqara cemiyetni Rusiye Federatsiyasına basqısını arttırmağa çağırdı. Bu aqta müessiseniñ matbuat hızmeti haber ete.
Salı künü, boş aynıñ 17-den başlap, suv anbarlarındaki suvnıñ pek az olğanı sebebinden vaqtınca işğal etilgen Qırımdaki Aqmescit şeerinde yañı suv berüv cedveli amelge keçirilecektir. Bu aqta ''Voda Krıma'' şirketiniñ matbuat hızmeti haber etti.
Bazar künü, boş aynıñ 15-de, Qırımtatar Maaliy Merkezi "Fridrih Naumann adına Azatlıq fondunıñ" Ukrainada vekilliginiñ qol tutuvı ile Qırımtatarlar halq ögünde keçirecek diplomatiya IV Akademiyasınıñ 3-nci sessiyasını keçirdi. Keleçekte halq ögündeki diplomatlarğa global siyaset ve dünya tertibiniñ hususiyetleri ve insan aqlarını qorçalamağa yardım etken halqara vastalar boyunca lektsiya oquldı.
Boş ay 16 kününiñ sabası itibarınen vaqtınca işğal etilgen Qırımda ve Aqyar şeerinde tacmaraz hastalığına daa 216 kişi oğrağan. Ağımdaki yılnıñ başından berli Qırımda 15892 kişiniñ bu hastalıqqa oğrağanı aqqında bellidir.
Bazarertesi künü, boş aynıñ 16-da, Qırımnı suv ile temin etüv boyunca muşavere esnasında Qırım ''başlığı'' Sergey Aksönov berüv cedveline ve suvnıñ keyfiyetine riayet etilmegenine dair şikâyetler almağa devam ekenini qayd etti.
Moskova vilâyeti Vlasiha şeer bölüginiñ temyiz arbiy mahkemesi Aluştadaki ''Hizb ut-Tahrir davasınıñ” iştirakçilerine apis müddetlerini uzattı. Siyasiy mabuslar tevqivhanede 2021 senesi qara qış ayınıñ 21-nece qalacaqlar.
Cumaertesi künü, boş aynıñ 14-de, Qırımtatar Maaliy Merkezi "Fridrih Naumann adına Azatlıq fondunıñ" Ukrainada vekilliginiñ qol tutuvı ile Qırımtatarlar halq ögünde keçirecek diplomatiya IV Akademiyasınıñ faaliyetini devam etti. II-nci sessiyası çerçivesinde keleçekte halq ögündeki diplomatlar #LIBERATECRIMEA halqara areketiniñ faaliyetinen tanışıp, dünya siyasetinde Ukrainanıñ hususiyetleri aqqında haberdar etildiler.
İşğal etilgen Qırımdaki ''prokuratura'' RF Ceza kodeksiniñ 205.6 maddesi (cinayet aqqında haber etmeyüv) boyunca faalci Ridvan Umerovğa qabaatlayıcı yekünini teslim etti. Bu aqta ''Qırım birdemligi'' haber ete.
Qırımtatar Maaliy Merkezi idaresiniñ yolbaşçısı, Qırımtatar Milliy Meclisiniñ azası Eskender Bariyev isan ölçevi boyunca AHİT qoşma muşaveresinde ''Din ya da inanç serbestligi: işbu aqnıñ er kes içün keliştirilmesinde dijital vastalarnıñ ve grajdan cemiyeti iştirakçileriniñ rölü'' mevzusında çıqışta bulundı. Bariyev işğal etilgen Qırımda insan aqlarınıñ bozuluvları aqqında ikâye etip, RF öz qanuniyetini qırımtatar halqınıñ zorbalıqsız küreşini boğmaq maqsadınen qanunsız şekilde qullanğanını qayd etti.
Cumaaqşamı künü, boş aynıñ 12-de, Rostov-na-Donu şeerindeki Cenübiy okrugınıñ arbiy mahkemesi Qarasuvbazardaki ''Hizb ut-Tahrir davası” iştirakçileriniñ apis müddetleriniñ uzatıluvına dair abulqatları tarafından berilgen istinaf şikâyetlerni red etti. Siyasiy mabuslar tevqivhanede 2021 senesi qara qış ayınıñ 15-nece qalacaqlar.
Boş ay 13 kününiñ sabası itibarınen vaqtınca işğal etilgen Qırımda ve Aqyar şeerinde tacmaraz hastalığına daa 266 kişi oğrağan. Ağımdaki yılnıñ başından berli Qırımda 14634 kişiniñ bu hastalıqqa oğrağanı aqqında bellidir.