Haberler

21.11.2020

Yaqın Şarqnıñ hususiyetlerinden insan aqlarını qorçalağan halqara vastalarınace: Qırımtatarlar halq ögünde keçirecek diplomatiya Akademiyası öz faaliyetini devam ete

Cumaertesi künü, boş aynıñ 21-de, Qırımtatar Maaliy Merkezi "Fridrih Naumann adına Azatlıq fondunıñ" Ukrainada vekilliginiñ qol tutuvı ile Qırımtatarlar halq ögünde keçirecek diplomatiya IV Akademiyasınıñ 4-nci oturışuvını keçirdi, kelecekte halq ögündeki diplomatlar Yaqın Şarqnıñ hususiyetlerinen ve insan aqlarını qorçalağan halqara vastalarınen tanış oldılar.

20.11.2020

Qırımda büyük suv havuzlarnıñ deerlik episinde suv küzgüsiniñ meydanlığı eksilmekte (video)

Cuma künü, boş aynıñ 20-de Qırımtatar Maaliy Merkeziniñ hadimleri ve ekspertleri Qırımnıñ suv menbalarını satellitten yapılğan resimler vastasınen nezaret etüvniñ neticelerini taqdim ettiler. Tedqiqatnıñ neticelerine binaen, Qırımda büyük suv havuzlarnıñ deerlik episinde suv küzgüsiniñ meydanlığı eksilmektedir. 2015 senesinden başlap, 2020 senesine qadar suv küzgüsi meydanlığınıñ eksilmesi ortalama 32% teşkil ete: suv havuzlarında 43% ve göllerde 25%.

20.11.2020

Bahçisaraydaki üçünci "Hizb ut-Tahrir davasınıñ” iştirakçileri Rostovdaki tevqivhanege avuştırıldı

Bahçisaraydaki üçünci «Hizb ut-Tahrir davasınıñ» iştirakçileri Osman Seytumerov, Seytumer Seytumerov ve Rustem Seytmemetov işğal etilgen Qırımdan Rostov-na-Donu şeerindeki tevqivhanege avuştırıldı. Bu aqta ''Qırım birdemligi'' haber ete.

20.11.2020

RF Donbasnı Qırım mevzusından diqqatnı başqa tarafqa çekmek içün qullanacaq - Yaremenko

Vaqtınca işğal etilgen topraqlarnı ğayrıdan integratsiya etüv meseleleri boyunca Nazirniñ muavini İgor Yaremenko RF Donbasnı öz menfaatları içün, yani diqqatnı Qırım mevzusından başqa tarafqa çekmek içün qullanacağını qayd etti. Bu aqta müessiseniñ matbuat hızmeti haber ete.

20.11.2020

Qırımtatar Maaliy Merkezi RF aqılsız siyasetiniñ Qırımdaki suv yedeklerine tesiri aqqında BM teşkilâtınıñ mahsus maruzacısına malümat berdi

Qırımtatar Maaliy Merkezi ''İşğalci Rusiye Federatsiyası alıp barğan aqılsız siyasetiniñ Qırımdaki suv yedeklerine tesiri'' mevzusında BM teşkilâtınıñ insan aqları ve etraf müit meseleleri boyunca mahsus maruzacısı Devid Boydğa malümat toplap yolladı.

20.11.2020

İşğalciler Qırımda yaşağan jurnalistni ''ufaq yaramazlıq'' yapqanı içün yaqaladı

İşğalci Yalta mahkemesi yeri jurnalist Sergiy Sardıknı ''ufaq yaramazlıq'' yapqanı içün üç künge azatlıqtan marum etti. Jurnalist bundan şeer memuriyetiniñ başlıq muavini Stanislav Şaportovnı teñkit etti. Bu aqta yerli bloger Oleksandr Talipov haber etti.

20.11.2020

İşğal etilgen Qırımda daa 259 kişi tacmaraz hastalığına oğrağan

Boş ay 20 kününiñ sabası itibarınen vaqtınca işğal etilgen Qırımda ve Aqyar şeerinde tacmaraz hastalığına daa 259 kişi oğrağan. Ağımdaki yılnıñ başından berli Qırımda 16901 kişiniñ bu hastalıqqa oğrağanı aqqında bellidir.

20.11.2020

BM teşkilâtı RF-nı bütün Qırım sakinleriniñ yeterli mesken aqlarına riayet etmege çağırdı

BM teşkilâtı Rusiye Federatsiyasını bütün Qırım sakinleriniñ yeterli mesken aqlarına riayet etmege ve ayrımcılıq yapmadan içtimaiy meskenge irişimlerini temin etmege çağırdı. Bu aqta insan aqları boyunca BMT Yuqarı komissarı İdaresi ve Ukrainada insan aqları boyunca BM missiyası tarafından yarımadadaki içtimaiy mesken aqqında taqdim etilgen tezkerede haber etildi.

19.11.2020

İşğalciler faalerni Qırım köprüsinde tutqan quvetçilerniñ areketlerinde bozuluvlar körmeyler

İşğal etilgen Qırımda yol polisi boş ay 2-3 gecesi Qurmandaki ''Hizb ut-Tahrir davasınıñ” iştirakçilerine çıqarılğan ükümlerni ilân etilmesine ketken faalerni tutqan quvetçilerniñ areketlerinde bozuluvlar tapmağan. Bu aqta ''Qırım birdemligi'' haber etti.

19.11.2020

Qırımtatar faali «ekstremizm qabul etilmeycegine dair» tenbi vesiqasını aldı

''E'' merkeziniñ hadimleri Sudaqta yaşap, Meganov burnında alıp barılğan qurucılıqqa qarşı çıqqan faalci Rustem Abkadırovnı ''ögüni aluv sübetine'' çağırdı. Faalci «ekstremizm qabul etilmeycegine dair» tenbi vesiqasını aldı. Bu aqta o, öz Facebook saifesinde haber etti.

19.11.2020

İşğal etilgen Qırımda daa 273 kişi tacmaraz hastalığına oğrağan

Boş ay 19 kününiñ sabası itibarınen vaqtınca işğal etilgen Qırımda ve Aqyar şeerinde tacmaraz hastalığına daa 273 kişi oğrağan. Ağımdaki yılnıñ başından berli Qırımda 16642 kişiniñ bu hastalıqqa oğrağanı aqqında bellidir.

19.11.2020

Al-azırda 45 biñ insan Qırımnı terk etti - Kıslıtsâ BM teşkilâtında

Çarşembe künü, boş aynıñ 18-de, Qırım boyunca qararnameniñ taqdim etilüvi esnasında Ukrainanıñ BM teşkilâtında temsilcisi Sergiy Kıslıtsâ, 45 biñ insan Qırımnı terk etkenini, Jeneva beyannamelerini ve protokollarını bozğan işğalci devlet ise yarımadağa öz ealisini köçürgenini qayd etti. Bu aqta müessiseniñ matbuat hızmeti haber ete.

19.11.2020

Amerika kongressinde Rusiye Federatsiyasınıñ G7 körüşüvlerinde iştirak etmesine qarşı qanun leyhası qabul etildi

ABD Kongresiniñ vekilleri Qırımnı işğal etken Rusiye Federatsiyasınıñ ''Büyük yedilik'' (G7) körüşüvlerinde iştirak etmesine ve G8 ğayrıdan tiklenmesine qarşı qanun leyhasını qabul ettiler. Bu aqta ''Amerika sedası'' haber ete.

19.11.2020

BM Baş Assambleyası işğal etilgen Qırımdaki vaziyetke dair yañı qararname qabul etti

Çarşembe künü, boş aynıñ 18-de, BM Baş Assambleyası 75-nci toplaşuvınıñ Üçünci komiteti ''Ukrainanıñ vaqtınca işğal etilgen Qırım Muhtar Cumhuriyeti ve Aqyar şeerinde insan aqları saasında vaziyet'' mevzusında beşinci qarar leyhasını qabul etti. Mütenasip qararğa 63 devlet qol tuttı, 22 - qarşı çıqtı.

18.11.2020

Rusiye artıq ''RF topraqlarını yabancılaştıruvğa'' dair çağıruvlar içün cöreme kesecek

RF Devlet duması üçünci oquvda ''Ekstremistik faaliyetke qarşılıq kösterüv aqqında'' Rusiye qanunına tüzetüvler qabul etti, artıq ''RF topraqlarını yabancılaştıruvğa'' dair çağıruvlar içün kriminal mesüliyet ile cöreme kesilecek. Bu aqta parlamentniñ İnternet saifesinde haber etile.

18.11.2020

Siyasiy mabus Timur İbragimov uzun müddetten soñ ilk kere ömür arqadaşınen körüşti

70 mahkeme oturışuvından soñ Bahçisaraydaki ''Hizb ut-Tahrir davasınıñ” iştirakçisi Timur İbragimov ömür arqadaşınen körüşe bildi. Siyasiy mabusnıñ sırtı ve qolu ağırmağa devam ete. Bu aqta Qırımtatar Maaliy Merkezine onıñ ömür arqadaşı Dilâra haber etti.

18.11.2020

''Hastalıq qattı sürette artmaqta'' - işğalciler yarımadadaki tacmaraz aqqında

Çarşembe künü, boş aynıñ 18-de, COVİD-19 ile kureş boyunca operativ ştabnıñ oturuşuvında vaqtınca işğal etilgen Qırım boyunca Rospotrebnadzor başlığı Nataliya Penkovska yarımadada hastalıqnıñ qattı sürette artqanını qayd etti. Onıñ fikirince, qoşma sıñırlayıcı tedbirlerni amelge keçirmek kerektir.

18.11.2020

İşğal etilgen Qırımda daa 268 kişi tacmaraz hastalığına oğrağan

Boş ay 18 kününiñ sabası itibarınen vaqtınca işğal etilgen Qırımda ve Aqyar şeerinde tacmaraz hastalığına daa 268 kişi oğrağan. Ağımdaki yılnıñ başından berli Qırımda 16369 kişiniñ bu hastalıqqa oğrağanı aqqında bellidir.

18.11.2020

Şağlıq vaziyeti yaramay olğanına baqmadan, siyasiy mabus Teymur Abdullayev ŞİZO-da tutula

Sağlıq vaziyeti yaramay (sıcağı, öksürügi, zayıflığı) olğanına baqmadan, Aqmescitteki ''Hizb ut-Tahrir davasınıñ” iştirakçisi Teymur Abdullayev ŞİZO-da tutula. Oña tıbbiy yardım berilmey. Bu aqta siyasiy mabusnıñ anası Dilâra Abdullayeva öz Facebook saifesinde haber etti.

17.11.2020

ANONS: Qırımnıñ suv menbalarını satellitten yapılğan resimler vastasınen nezaret etüvniñ neticelerini taqdim etüv

Qırım yarımadasında suv menbalarınıñ qıtlığı meselesi 2020 senesiniñ qurğaq yazından soñ bir çoq matbuat vastalarında eali içün suv yetmegeni ve suv anbarları quruğanı aqqında haberler peyda olğanınen özüne büyük diqqat celp etti. Vaziyetni, onıñ kölemini ve sebeplerini talil etmek maqsadınen Qırımtatar Maaliy Merkeziniñ ekspertleri açıq satellit malümatlarını işlettiler. Jurnalistlerni ve bütün aves etken insanlarnı Qırımnıñ suv menbalarını satellitten yapılğan resimler vastasınen nezaret etüvniñ neticelerini cuma künü, boş aynıñ 20-de saat 11:00-de Zoom platformasında (aşağıdaki bağlantı boyunca evelden qayd etilip) taqdim etüvge davet etemiz. Tedbir Qırımtatar Maaliy Merkeziniñ Facebooktaki saifesinde de yayınlanacaqtır.