Qırımtatar Maaliy Merkezi
+38 (067) 343 74 54   +38 (044) 489 61 25

‘Eki bayraq- bir ülke’: Kiyevde qırımtatar bayraq künü munasebetinen matbuat-konferentsıya keçirildi

21.06.2022

Salı künü, iyülniñ 21-inde ‘Ukrinform’ informatsıon agentliginde Qırımtatar resurs merkezi, Ukraina vicdan serbestligi ve etnosiyaseti boyunca Devlet hızmeti ve Qırımtatar milliy Meclisi Qırımtatar milliy bayraq künü munasebeti ile #LIBERATECRIMEA areketiniñ informatsıon kampaniyası çerçivesnde ‘Eki bayraq- bir ülke’ mevzusında matbuat-konferentsıyanı keçirdiler.

Spikerler:

 Eskender Bariyev - Qırımtatar resurs merkeziniñ reisi, qırımtatar Meclisi çetel işler ve huquq meseleleri boyunca idaresiniñ başı;

Yelena Bogdan- Etnosiyaset ve vicdan serbestligi boyunca Ukraina devlet hızmetiniñ başı;

Refat Çubarov- qırımtatar milliy Meclis reisi;

Ahtem Seytablayev- kinorejissör;

Andrey Yermolenko- ressam-karikaturcı;

Tatyana Podvornãk- QRM kommunikatsıya meneceri.

Eskender Bariyev öz çıqışında qırımtatar bayrağınıñ tarihı hikãye etti. Ekspert bu künü milliy ve halqara seviyesinde nasıl qayd etilgeni ve  ‘#LIBERATECRIMEA»- bir bayraq altında’ aktsıyası haqqında qonuştı. Mezkür aktsıya çerçivesinde qırımtatar bayrağı 9 ay içinde dünyanıñ 28 ülkesini ziyaret etti.

 ‘Bugünde bugün qırımtatar bayrağı Qırımnıñ azat etilmesi ve Ukraina bütünliginiñ timsali olıp qaldı. Qırımtatar bayrağına öz hürmetini diplomatlar, siyasetçiler, cemaat erbapları, ukrain halqı bildire. Qıyınlıqlarğa baqmadan, yaqın zamanda bayraqlarımız serbest ukrain Qırımımızda dalğanacağına eminmiz’,- dedi Bariyev.

Refat Çubarov qayd etkeni kibi, qırımtatar bayrağı küreşniñ timsali olıp qaldı. Milliy bayraqqa beslenilgen hürmet ve sevgi milletni bir arağa ketire, qırımtatarlarnıñ yañı neslini ecdatlarımıznıñ qaramanlıqları ile birleştire.

Yelena Bogdan öz çıqışında qırımtatar ve ukrain halqlarnıñ bir ülkede eki bayraq altında birleşmesiniñ emiyetini qayd etti.

Bugünde bugün qırımtatar bayrağı bizler içün pek çoq mana taşıy: boysunmağanlarnıñ ruhu, öz tuvğan topraqlarında serbest olmaq arzusı, yoq olmaq telükesi altından yañıdan tiklenmek, ümüt ve adalet, serbestlik, ana yurt oğrunda cesür adımlar timsalidir’,- qayd etti o.

Ahtem Seytablayev Qırımtatar bayraq kününiñ, ayrıca da bu cenk şaraitlerinde, qıymetini añlattı. Bayraq küreş, azatlıq timsali olur eken, Ukrainanıñ her bir vatandaşı içün qıymetli olmalı.

Tedbir çerçivesinde Tatyana Podvornãk QRM tarafından #LIBERATECRIMEA areketiniñ informatsıon kampaniyası çerçivesinde hazırlanılğan vizual- informatsıon malümatlarnı taqdim etti: metin, plakatlar, bord kampaniyası.

 ‘İnformatsıon malümatlarımız ukrain cemaatçılığı qırımtatar bayrağınıñ tarihı haqqında daha çoq bilmesine doğrultılğan. Şundan da ğayrı, malümatlarımız yardımınen eki milletniñ bir ülkede birleşmesine ıntılamız. Şunıñ içün de pervasız qalmağanlarnı faaliyetimizge qoşulmağa çağıramız’,- dedi o.

QRM muntazam şekilde çeşit tarihler munasebi ile vizual malümatlarnı taqdim etip turmaqta. Faal cemaatçılar plakat ğayeleri üzerinde çalışa. Ressam Andrey Yermolenkonıñ icadı ile ise plakatlar soñ sıfatına qavuşalar.

 ‘100 kere eşitmekten bir kere körmek daha yahşı. Buça, Mariupol, Harkov, Severedonetskte çıqarılğan bir foto vesiqalarda tarif etilgen malümatlardan daha mündericelidir. Cenk vaqtında kerçekni aks etmek, ümüt bağışlamaq, askerlerniñ ruhunı kötermek- cenk vaqtında qoluna silã almağan ressamnıñ vazifesidir!’- qayd etti o.

Hatırlatamız ki, evelden QRM #LIBERATECRIMEA areketiniñ yañı informatsıon kampaniyasını taqdim etken edi. Mezkür kapmaniya Ukraina ealisi işğal etilgen Qırımdaki vaziyetni açıqlamaq niyeti ile çalışmaqta.

 Kampaniyamız ile tafsilãtlıca nevbetteki sahifelerde tanış olmaq mümkün:

https://www.ctrcenter.org/liberatecrimea

Facebook: https://www.facebook.com/liberatecrimea

Telegramm: https://t.me/LIBERATECRIMEA