Qırımtatar Maaliy Merkezi
+38 (067) 343 74 54   +38 (044) 489 61 25

RF Qırımda nevbetteki qanunsız arbiy talimler keçirdi

12.01.2022

Salı künü, yanvarniñ 11-inde işğal etilgen Qırımda nevbetteki qanunsız arbiy talimler keçirildi. Tedbirlerde 500 piyade deñizci ve mühendis iştirak etti. Qaradeñiz flotu raketa darbelerni çalıştı, atış silãhlarınen talimler keçirdi. Bu aqta Qaradeñiz flotunıñ matbuat hızmeti haber ete.

‘Askerler raketa darbelerni idare etüvi boyunca talimlerni başladılar ve atış silãhlarınen çalışmağa ögrendiler’,- denile haberde.

Qayd etilgenine köre, talimler içün Qırım poligonlarına onlarnen maşına, silãh, 500 piyade deñizci ve mühendis, topçular ketirildi.

Hatırlatamız ki, işğal etilgen Qırımda muntazam şekilde arbiy talimler, askerlik hızmetiniñ  propagandası keçirile, RF silãhlı küçler saflarına qoşulmağa çağırıla. Rusiye askerleri tarafından keçirilgen arbiy talimler yarımadanıñ ekosistemasına zarar ketire ve halqara qanunnı boza.

Evelden NATO Qırım boyunca beyanatında Rusiyeniñ arbiy küçü keniş şekilde artqanını mahküm etip, Qara deñizde Rusiyeniñ arbiy küçü arttırılmasına dair öz endişelerini bildirdi.