Qırımtatar Maaliy Merkezi

Qırım faal cemaatçıları işkencelerni toqtatmaqnı talap eteler

06.01.2022

İşğal etilgen Qırımda qırımtatar faal cemaatçıları Nariman Ametovğa nisbeten işkenceler dolayısı ile fleşmob başlattılar. Yarımada sakinleri repressiya ve işkenceler toqtatılmasını talap eteler. Bu aqta 'Qırım birdemligi’ bildire.

Fleşmobğa Qurman, Canköy, Bağçasaray, Seitler, Aluşta, İslãm-Terek rayonından qadınlar qoşuldı.

Hatırlatamız ki, evelden Nariman Ametov elektrik toknen işkencege oğratılğanı belli oldı. Faal cemaatçılar yüz bergen deşetli qanunsızlıqqa qarşı çıqıp, işkence ve repressiyalar toqtatılmasını talap eteler.

‘Biz mında erkeklerimizge nisbeten kösterilgen işkence ve basqığa qarşı çıqqanımıznı bildirmek içün toplaştıq. Yigitlerimizni işkencege oğratır ekensiz, olarnıñ anaları ve balaları aynı işkencege oğratıla’,- paylaştı Nadiye İzetova, siyasiy mahbüs- Riza İzetovnıñ anası.

‘Qaçırmalar, işkence, basqılar kimseni pervasız qaldıramaz. Buña qarşı çıqamız, kelecegimiz içün endişelimiz ve hakimiyetten bu kergin vaziyetten çıqış yollarını bulıp, çare tapmalarını talap etemiz,’- rahatsızlığını gizlemey Muhammed-Ali Fakidov.