Qırımtatar Maaliy Merkezi

Ukraina ÇİN ve Qırım platformasınıñ ekspert ağı memorandum imzaladılar

19.11.2021

Ukraina Çetel İşler Nazirligi ve Qırım platformasınıñ Ekspert ağı körüşüv keçirip, işbirlik haqqında memorandum imzaladılar. Tarafdaşlar birlikte amelge keçirecek faaliyetiniñ maqsat ve vazifelerini muzakere ettiler.

Vesiqanı imzalağanlar: Ukraina çetel işler naziri Dmitriy Kuleba, ekspert ağı iş taqımlarınıñ yedi yolbaşçısı, şu cümleden, Qırımtatar resurs merkeziniñ reisi, qırımtatar Meclisi çetel işler ve huquq meseleleri boyunca idaresiniñ başı Eskender Bariyev.

Memorandum birlikte tedbirler, konferentsıya, seminar, tögerek masalarnıñ keçirilmesini, serbest analitik merkezleriniñ tetqiq leyhalarınıñ destegini, Qırım platformasınıñ inkişafını közde tuta.

Eskender Bariyev mezkür vesiqanı ‘Tamır halqlar haqlarınıñ tiklenilmesi Qırım deokkupatsıya aleti olaraq’ iş gruppasınıñ yolbaşçısı sıfatında imzaladı. Onıñ qayd etkenine köre, iş gruppasınıñ esas maqsadı Ukraina tamır halqlar haqlarınıñ, ayrıca da, öz-özüni tayin etüv haqqı, territoriya, topraq, resurslar, öz siyasiy, iqtisadiy, medeniy sistema ve institutlarınıñ saqlanılması ve inkişaf etilmesine haq, serbest, añlı razılıq printsipine riayet etilmesine haq, insan haqlarını bozuvlarınıñ aldını almaq usullarnı işlep çıqarılmasına, qabaatlılarnı mesuliyetke çağırmaq, halqara ekspert muhitiniñ Qırım tamır halqlar haqlarınıñ qorulması ve amelge keçirilmesi içün celp etmek haqqı tiklenilmesine destek köstermektir.

‘İşğalcılar eñ yüksek siyasiy seviyede Ukrainada tamır halqlar haqqında qanun qabul olunmasına pek kergin munasebet köstereler. Putin mezkür qanunnı kütleviy şekilde yoq etüv silãsı dep adlandırdı. İşte, öyle olsa, ‘putinniñ rusiyesi içün kütleviy iekilde yoq etken bu silãhnı’ hep inkişaf ettirecekmiz, yani Ukraina tamır halqlarnıñ qanunlarını tiklep, amelge keçirecekmiz’,- qayd etti o.

Hatırlatamız ki, QRM ekspertleri ‘Tamır halqlar haqlarınıñ tiklenilmesi Qırım deokkupatsıya aleti olaraq’ ve ‘İqtisadiyat ve ekologiya’ iş gruppalarınıñ faal iştirakçileridir.