Qırımtatar Maaliy Merkezi

Siyasiy mahbüs Asan Ahtemov daha bir cinayette qabaatlandı

18.11.2021

4 sentãbrde tutuqlanğan qırımtatar Asan Ahtemov yañı cinayette qabaatlandı. Onı ‘patlayıcı maddelerniñ bir qaç şahıs tarafından teşkil etilgen kontrabandası’nda qabaatlaylar. Bu aqta ‘Qırım birdemligi’ bildire.

Mezkür cinayet boyunca ceza 7-12 yılğa qadar hapis ve 1 million para tölemesini közde tutqanı qayd oluna.

Hatırlatamız ki, 3-4 sentãbr künleri işğal etilgen Qırımda  Eldar Odamanov, Aziz Ahtemov, Şevket Useinov, Asan Ahtemov ve Nariman Celãlnıñ evlerinde tintüvler keçti. Silãhlı küçler tehnikanı çıqarıp, erkeklerni özlerinen alıp kettiler.Soñra belli olğanı kibi, Nariman Celãl ve Aziz ve Asan Ahtemovlar eki doğmuş ağa-qardaşnı diversiyada iştirak etkenlerinde qabaatlaylar. İşğalcılarnıñ aytqanlarına köre, olarnıñ Angara köyünde gaz borusınıñ bozulmasına alãqası bar. 6 sentãbr künü işğal etilgen Qırımda rusiye ‘mahkemesi’ qırımtatar Milliy Meclis reisiniñ birinci muavini Nariman Celãl ve Ahtemovlar Aziz ve Asannı eki ayğa, yani 2021 senesi 4 noyabrge qadar hapiske aldı.