Qırımtatar Maaliy Merkezi

Qırımtatar Milliy Meclis temsilcileri İndoneziya elçisinen körüştiler

20.10.2021

Salı künü, oktãbrniñ 19-ında qırımtatar Milliy Meclis ofisinde Ukrainada İndoneziya Cumhuriyetiniñ Fevqulade ve Vekãletli Elçisi Yuddi Krisnandinen körüşüv olıp keçti. Subetdeşler işğal etilgen Qırımdaki vaziyetni munaqaşa eterek, ‘Qırım platforması’nıñ faaliyetine ayrı diqqat ayırdılar.

Körüşüvde Ukrainada İndoneziya Cumhuriyetiniñ Fevqulade ve Vekãletli Elçisi Yuddi Krisnandi, Ukrainada İndoneziya Elçiliginiñ siyasiy bölük başı Margaret Puspita, Ukraina halq deputatı Mustafa Cemilev, Milliy Meclis reisi Refat Çubarov, Qırımtatar resurs merkeziniñ reisi, qırımtatar Meclisi çetel işler ve huquq meseleleri boyunca idaresiniñ başı Eskender Bariyev, Milliy Meclis azaları Riza Şevkiyev ve Gayana Yuksel iştirak ettiler. 

 Qırımtatar Milliy Melcis temsilcileri diplomatlarğa işğal etilgen Qırımda insan haqlarını bozuluvınen bağlı vaziyet, tamır halqqa nisbeten repressiyalar, milliy ve diniy mensüplikke köre sistemli taqipler haqqında malümat berdiler. 2021 senesi avgustnıñ 23-ünde sammiti keçirilgen ‘Qırım platforması’nıñ faaliyetine bayağı diqqat ayırıldı.