Qırımtatar Maaliy Merkezi

QRM Sloveniya elçiliginen ilerideki işdeşligini muzake etti

20.10.2021

Çarşenbe künü, oktãbrniñ 20-sinde Qırımtatar resurs merkezi Ukrainada Sloveniya elçiliginiñ temsilcilerinen körüşti. Diplomatlarğa işğal etilgen Qırımda insan haqlarınıñ bozuluvınen bağlı vaziyetni añlattılar. Şundan da ğayrı, subetdeşler ileride işbirlik yollarını muzakere ettiler.

Körüşüvde Sloveniya Elçisi Tomaj Mençin, missiya Başınıñ muavini, vekãletli nazir Blaj Masle, QRM reisi Eskender Bariyev , QRM menecerleri Zarema Bariyeva ve Lüdmila Korotkih iştirak ettiler.

QRM temsilcileri Sloveniya elçilerine işğal etilgen Qırımda insan haqlarınen bağlı vaziyetni, qırımtatar ve ukraintaraflılarğa nisbeten repressiyalar haqqında hikãye ettiler, işğalden berli ğayıp ve elãk olğanlar, siyasiy mahbüsler haqqında malümat berdiler.Teşkilãt tarafından işlep çıqarılğan ve saytta 4 tilde malümat bergen ‘Qırım işğaliniñ’ qurbanları adlı diagramma taqdim etildi.

Diplomatlarğa Qırım siyasiy mahbüsler haqqında QRM tarafından hazırlanğan ‘Babam-qaramandır!’ bukletleri ve ‘2020 senesine işğal etilgen Qırımda vaziyetniñ talili’ esabatını berildi.

Şundan da ğayrı, elçige Qırım işğaliniñ esiri olıp qalğan 20 qırımtatar ailesiniñ taqdirini añlatqan ‘İşğalniñ esirleri’ adlı albom berildi.

İşğal etilgen Qırımda insan haqlarını bozulmasında qabaatlılarnı mesuliyetke çağırmaq ve bozulmasını aldını almaq içün QRM temsilcileri elçige Sloveniyada ‘Magnitskiy aktı’ misalinde insan haqlarını bozulmasında mesuliyetlerge nisbeten  şahsiy sanktsıyalarnı közde tutqan qanunnı qabul etüvine yardımcı olmağa teklif ettiler.

‘Sloveniya Cumhuriyeti Qırım Platformasına qoşulğanı içün minnetdarlıq bildiremiz. Qırım platformasınıñ maqsadlarını amelge keçirmek içün Ukraina, Sloveniyada halqara forumnı keçirmege teklif etemiz’,- qayd etti Bariyev.

Subetdeşler forum çerçivesinde köterilecek meselelerni muzakere ettiler. Ayrıca, elçilik temsilcilerini qırımtatar halqı, onıñ medeniyeti, urf-adetleri, oña qarşı yapılğan repressiyalar mevzusı meraqlandıra. Bu munasebet ile, QRM menecerleri işğalden dolayı Qırımnı terk etmege mecbur olğan ve Qırımda qalğan qırımtatarlar her kün rastkelgen meseleleri haqqında hikãye ettiler. Tamır halqnıñ öz-özüni teşkil etüv, qırımtatar Milliy Meclis azalarına qarşı repressiyalar mevzusı da açıqlanıldı.

QRM reisi 1944 senesi qırımtatar sürgünligi, 238 500 adam sürgün etilgeni, sürgünniñ ilk yılları elãk olğanlarnıñ sayısı 110 200 yetkenini añlattı.

 ‘Qırımtatarlarnıñ sürgünligi halã daha devam ete. Qırım 2014 senesi işğal etilgen soñra biñlernen qırımtatar öz siyasiy mevamı sebebinden Qırımnı terk etmege mecbur oldılar. Şundan da ğayrı, RF yañı ‘zoraki evakuatsıya’ haqqında qanun kirsetildi. Mezkür qanun uyğun kelmegen ealini, ayrıca da qırımtatarlarnı, sürgün etmege yardım etecek’,- añlattı Bariyev.

 Diplomatlar QRM temsilcilerine minnetdarlıq bildirip, Ukraina suvereniteti ve territorial bütünligine qoltutqanlarını tasdiqladılar.