Qırımtatar Maaliy Merkezi

‘Bala bağçasına olarnı babası alıp ketkenini istey ediler’- Arsen Abhairovnıñ ömürarqadaşı

04.10.2021

İşğal etilgen Qırımda yüzlernen bala babasız, onıñ diqqatı ve tebessümsiz yaşamağa mecburlar. Pek te sağınalar. Siyasiy mahbüs Arsen Abhairovnıñ balaları babasını 3 yıldan ziyade körmeyler. Buna baqmadan, ümütlerini coymay, babasını beklemege devam eteler. Faqat ömürlerindeki mühim daqqalarını onsuz keçirmege mecburlar...

‘Men Arsen Abhairovnıñ ömürarqadaşı- Abhairova Azizem. Evimizde 2019 senesi, fevralniñ 14-ünde tintüv keçirildi. Şu künni unutmaq imkãnsızdır. Şu künniñ sabası  demir qapılarımız uruldı. Sanki çöküçnen ura ediler. Aqayım çıqıp baqqan soñ, tintüvnen kelgenini bildirdi. Bizden telefonlarımıznı aldılar. Advokatnı çağırmağa yasaq ettiler. Bizge her şey yasaq, dediler. Bunıñ neticesini endi bile edik, çünki birinci tintüv degil edi’,- añlattı Azize Abhairova.

 Qorantada eki bala bar. Büyügi- Medine 5 yaşında, endi ekinci sene bala bağçasına qatnay. Oğlunıñ adı Emir, o 3 yaşında. Olar bala bağçasına olarnı baba alıp ketkenini pek istey ediler. Pek beklediler, amma yazıq ki....

‘Tintüv olğanda oğlum tek 6 aylıq bala edi, ebette bir şey hatırlamay. O, babasını tek fotolardan tanıy. Resimlerine baqıp sevdi babasını. Qızım ise 2 buçuq yaşında edi ve şu künni pek yahşı hatırlay. Qızım yanımda edi. O uyanğanınen közü ogünde maskalı adamlarnı kördi. Şimdi ‘Babañ qayda?’, dep sorasalar: ‘onı maskalı zulum adamlar alıp ketti’, dep cevap bere. Eki yaşında bala olsa da, bu vaqia aqlından çıqmay’,- dep paylaştı qadın.

Erkekni yaqalağanları artıq 3 yıl oldı, amma balalarınen körüşmege bir kere bile imkãn berilmedi.

 Biz her kün baba haqqında laf etemiz. Qızım aqayıma her kün bir şeyler yollağanımnı köre. ‘Bu menim eñ sevimli qanfetlerim. Olardan babama da yolla’ dey. Emir de baqsam, babası haqqında soramağa başladı. 3 yaşında bala babasına ne yollaycağımnı, bir şey unutmağanımnı soray.  Çünki o bizim kerçegimiz. Ömrümiz babamızğa bir şeyler yollamalarnen keçe.  Men bir yerge çıqsam, balalar şu daqqası: ‘Mahkemege ketesizmi? Babağamı? Bir şey yollaycaqsızmı?’, bir ağıznen soraylar. Olar endi alışıp qaldılar’,- qayd etti Azize.

Arsen Abhairovnıñ ömürarqadaşı balalarınen artıq büyüklernen laf etilgeni kibi laf etmek kerek, dep tüşüne. Babaları terrorist olmağanı, eñ merametli, eñ yahşı, her kesge yardım etken adam olğanını daima hatırlatmaq kerek.

 

‘Qızım ‘tek menim degil de, başqa babalar da qaytmasını isteyim’, dep dua ete. O ümütini coymay. Men de tezden qavuşacağımızğa inanam. Biz ise, ömürarqaşları, huquqqoruyıcılar bu mevzunı her herde açıqlamaq, bu meseleni her yerde kötermek kerekmiz’,- qoştı o.

Keliñiz, balaçıqlarğa yardım eteyik ve babalarını qaytarayıq...Qırımtatar resurs merkeziniñ taqımı eñ yaqın kelecekte her bir bala öz babasına qavuşması içün elinden kelgenini yapmağa tırışa.

Mezkür maqsatqa yetmek içün QRM ‘Babamnı qaytarıñız!’ adlı qısqa vesiqalı filmni çıqarmağa qarar berdi.

 Filmde Qırım işğalinden soñra babaları qaçırılğan, ya da hapiske atılğan balalarnıñ taqdir hikãyelerini topladıq. Bazıları babalarınıñ zulumlı tutuqlamalarını öz közlerinen kördiler ve şimdi olarnıñ tek bir arzuları bar: ‘Babamnı qaytarıñız!’

 Mezkür film ile ukrain ve halqara cemaatçılıqnıñ diqqatını Qırım siyasiy mahbüsleri ve  balalarınıñ meselesine çekmege isteymiz.

 Eñ yaqın zamanda filmniñ premyerası olacaq. Haberlerimizni taqip etiñiz.