Qırımtatar Maaliy Merkezi

QRM qırımtatar halq diplomatlarını hazırlamağa devat ete

04.10.2021

Cumaertesi künü, oktãbrniñ 2-sinde, Qırımtatar resurs merkezi Ukrainada ‘Fridrih Naumann Fondu’ Temsilciliginiñ destegi ile V qırımtatar diplomatiya Akademiyasınıñ işini başladı. Oqutuv devamında 5 sessiya, olarnıñ çerçivesinde mutehassis oca ve ekspertler iştirakçilerge dünya siyasetiniñ trendleri, Qırımda insan haqlarınıñ bozuluvı, advokat kampaniyaları, insan haqlarını qoruvnıñ halqara usulları, halqara kampaniyalarda vizual til ve dizaynnıñ rolü haqqında añlatılması közde tutula.

V qırımtatar diplomatiya Akademiyasınıñ I sessiyasını Qırımtatar resurs merkeziniñ reisi, qırımtatar Meclisi çetel işler ve huquq meseleleri boyunca idaresiniñ başı Eskender Bariyev, Ukrainada ‘Fridrih Naumann Fondu’ Temsilciliginiñ leyha meneceri İrina Starovitskaya, QRM meneceri Zarema Bariyeva açtılar.

İrina Starovitskaya iştirakçilerge Ukrainada ‘Fridrih Naumann Fondu’nıñ faaliyeti, yönelişleri ve iş hususiyetleri haqqında hikãye etti.

Teşkilãtçılarnıñ aytqanına köre, 5 sessiya çerçivesinde mutahassis ekspertler rehberligi altında faalliler hazırlanılacaq ki, olar halqara cemaatçılıqnı Qırımda insan haqlarınıñ bozulması, qırımtatarlarğa nisbeten repressiyalar haqqında haberdar etecekler.

 Eskender Bariyev olacaq halq diplomatlarına Qırımdaki vaziyet, insan haqlarınıñ bozulması, Qırımtatar Milliy Meclisiniñ yasağı haqqında añlattı. Spikerniñ aytqanına köre, işğalden soñra yarımadada tintüvler, yaqalama, sorğu, tutuqlamalar muntazam şekilde keçirilmekte. Bunı QRM tarafından nezaret altında tutulğan statistika isbatlay.

‘Kelecekniñ Ukraina institutı’ analitik merkezniñ halqara siyaset boyunca eksperti İliya Kusa vizual şekilde dünya tertibi, halqara munasebetler ve dünya meydanında esas esnaslar haqqında hikãye etip numayış etti.

 Ekspertniñ aytqanına köre, şimdiki dünya tertibi II Cihan Cenkinden soñra şekillendi, amma Sovet Birligi dağılğan soñra küçler balansı biraz deñişti.

‘Halqara sistema 6 unsur temelinde qurula: global ideologiyalar, global teşkilãtlar, halqara norma ve qaideler, küçler balansı, regional alyanslar ve emek paylaşılması’,- qayd etti Kusa ve her bir unsur haqqında tafsilãtlı añlattı.