Qırımtatar Maaliy Merkezi

Nariman Celãlğa nisbeten qabaatlama sertleştirildi

14.09.2021

10 sentãbr künü işğal etilgen Qırımda FSB idaresi evelden Nariman Celãlnı cinayet yapılmasına yardım etkeninde qabaatlasa, şimdi diversiyada qabaatladı. Böyle etip, qabaatlanması daha sert oldı. Bu aqta öz Facebook sahifesinde advokat Nikolay Polozov haber ete.

Mezkür madde boyunca Nariman Celãl 10-15 yıl hapiske mahküm etilebilir.

Hatırlatamız ki, 3-4 sentãbr künleri işğal etilgen Qırımda  Eldar Odamanov, Aziz Ahtemov, Şevket Useinov, Asan Ahtemov ve Nariman Celãlnıñ evlerinde tintüvler keçti. Silãhlı küçler tehnikanı çıqarıp, erkeklerni özlerinen alıp kettiler.

4 sentãbr künü, rusiye silãhlı küçler işğal etilgen Qırımda  5 alıp ketilgen qırımtatarnıñ alını ögrenmek içün toplanğan 40 adamnı tutuqladılar. Olarnı 30000 ruble para cezasına mahküm ettiler.

Soñra belli olğanı kibi, Nariman Celãl ve Aziz ve Asan Ahtemovlar eki doğmuş ağa-qardaşnı diversiyada iştirak etkenlerinde qabaatlaylar. İşğalcılarnıñ aytqanlarına köre, olarnıñ Angara köyünde gaz borusınıñ bozulmasına alãqası bar.

Eldar Odamanov ve Şevket Useinov tintüvden soñra azat etilseler de, birazdan ‘poliske tabi olmağanları’ içün tekrar tutuqlandılar. Rusiye mahkemesi olarnı 14-15 künge  hapisledi.

6 sentãbr künü işğal etilgen Qırımda rusiye ‘mahkemesi’ qırımtatar Milliy Meclis reisiniñ birinci muavini Nariman Celãl ve Ahtemovlar Aziz ve Asannı eki ayğa, yani 2021 senesi 4 noyabrge qadar hapiske aldı.