Qırımtatar Maaliy Merkezi

Bariyev Qırımdaki işğalcılarnıñ ekitaraflı standartları haqqında

13.09.2021

Qırımtatar resurs merkeziniñ reisi, qırımtatar Meclisi çetel işler ve huquq meseleleri boyunca idaresiniñ başı Eskender Bariyev ‘Qırım.Haqiqat’ portalına intervyu bergende Qırımda işğlacılar ekitaraflı standartlarnı işletlenini bildirdi: bir taraftan koronavirustan dolayı kütleviy tedbirler keçirmege yasaq eteler, diger taraftan ise 6 biñge yaqın adam toplaycaq tedbir keçirmege hazırlanalar.

Şunı hatırlatmağa ister edik ki, evelden Qırım başı Sergey Aksönov 2020 senesi 17 mart qanunına deñişmeler kirsetip, yarımadada koronavirusnen bağlı sıñırlamalarını oktãbr ayına qadar uzattı.  Faqat kirsetilgen deñişmelerge köre, sıñırlamalarnıñ ‘Tavrida. ART’ adlı festivaline ve bir sıra diger kütleviy tedbirlerge alãqası olmaycaq.

‘Bir taraftan, ‘her şeyge hazır olmaq’ rejimini, illede soñki tintüv ve tutuqlamalarğa bağlap, kütleviy aktsıyalarnı keçirmemek içün qullanalar. Diger taraftan, 6 biñ adam toplaycaq tedbirni rahat-rahat keçirmege hazırlanalar. Yerli sakinler kerçekten endişeliler, çünki tedbirge Rusiyeniñ çeşit köşelerinden, atta diger memleketlerden  musafirler kelecek. Añlaşıla ki, Putin Qırımda çeşit halqara forumlar keçirilgenini numayış etmeli’,- tüşüne Bariyev.

QRM reisi qayd etkenine köre, rusiye hakimiyeti Ukraina hep yayınmasını istegen haberlerni- Nariman Celãl, Ahtemovlarnıñ tutuqlanmasını, hep bastırmağa istey. Neticede ögümizde eki manzara canlana: bir taraftan tintüv, taqip, işkence, diger taraftan acayip ziyafet levhası.