Qırımtatar Maaliy Merkezi

İHAM qırımtatarlarğa nisbeten rusiye hakimiyetniñ işkencelerine cevabı

10.09.2021

İnsan haqları boyunca Avropa mahkemesi rusiye hakimiyeti tarafından qırımtatar faalliler Asan Ahtemov ve Nariman Celãlğa nisbeten kösterilgen işkenceler haqqında beyanatqa cevap berdi. İHAM qoşma vesiqalarnı eline alğan soñra 39 qaideni amelge keçirmege hazırdır. Bu aqta ‘Qırım birdemligi’ bildire.

‘Qoruyıcınıñ aytqanına köre, İHAM qarar çıqarması içün Celãl ve Ahtemovnıñ tibbiy tetqiqat neticeleri haqqında malümat ve RF-nıñ işkence haqqında beyanatqa dair resmiy reaktsıyasını eline almalı. Mezkür malümatlarnı 23 sentãbrge qadar taqdim etmeli’,- denile haberde.

Hatırlatamız ki, 3-4 sentãbr künleri işğal etilgen Qırımda  Eldar Odamanov, Aziz Ahtemov, Şevket Useinov, Asan Ahtemov ve Nariman Celãlnıñ evlerinde tintüvler keçti. Silãhlı küçler tehnikanı çıqarıp, erkeklerni özlerinen alıp kettiler.

4 sentãbr künü, rusiye silãhlı küçler işğal etilgen Qırımda  5 alıp ketilgen qırımtatarnıñ alını ögrenmek içün toplanğan 40 adamnı tutuqladılar. Olarnı 30000 ruble para cezasına mahküm ettiler.

Soñra belli olğanı kibi, Nariman Celãl ve Aziz ve Asan Ahtemovlar eki doğmuş ağa-qardaşnı diversiyada iştirak etkenlerinde qabaatlaylar. İşğalcılarnıñ aytqanlarına köre, olarnıñ Angara köyünde gaz borusınıñ bozulmasına alãqası bar.

Eldar Odamanov ve Şevket Useinov tintüvden soñra azat etilseler de, birazdan ‘poliske tabi olmağanları’ içün tekrar tutuqlandılar. Rusiye mahkemesi olarnı 14-15 künge  hapisledi.

6 sentãbr künü işğal etilgen Qırımda rusiye ‘mahkemesi’ qırımtatar Milliy Meclis reisiniñ birinci muavini Nariman Celãl ve Ahtemovlar Aziz ve Asannı eki ayğa, yani 2021 senesi 4 noyabrge qadar hapiske aldı.