Qırımtatar Maaliy Merkezi

Yaltada fevqulade vaziyet ilãn etildi

18.06.2021

Cuma künü, 18 iyünde, işğal etilgen Qırımda, Yaltada qarardan ziyade yağanaq yağğanı içün fevqulade vaziyet ilãn etildi. Bu aqta Yalta memuriyetiniñ başı Yanina Pavlenko öz Facebook sahifesinde bildirdi.

‘Yaltada fevqulade vaziyetni ilãn etmege mecburmız. 11 saat içinde yağğan yağanaq sayısı 90 mm-den ziyade oldı. Özenler yalılarından çıqtı, şeherniñ merkezi suv içine bata. Adamlarnı havfsız yerlerge keçiremiz. Şeherniñ merkezi bütünley qapalı. Esas yolda maşnalar sıqışmasınlar dep ve suv sellerni temizlemek içün Oktãbr rayonında şeher kirişini qapattıq. Anda mahsus tehnikanı yolladıq’,- dedi o.

 Pavlenkonıñ aytqanına köre, al-azırda şeherge kiriş bütünley qapalı, çünki nezaret altından çıqqan suv selleri adam ve maşnalarnı alıp kete.