Qırımtatar Maaliy Merkezi

Işğal etilgen Qırımnıñ mahkemesi Edem Bekirovnı 7 yıl hapis cezasına mahküm etti

09.06.2021

Çarşenbe künü, 9 iyünde Aqmescit Merkeziy rayon mahkemesi sabıq siyasiy mabus Edem Bekirovnı 7 yıl hapis ve 150 000 ruble para cezasına mahküm etti.

Hatırlatamız ki, 2018 senesi 12 dekabrde Qırımğa kirilecek sıñırda, rusiye sıñırcıları tarafından Ukraina vatandaşı, Herson rayonı Novoalekseyevka köy sakini, 1961 senesi doğma qırımtatar Edem Bekirov tutuqlanğan edi. O, saba saat 8.30 tutuqlanıp, aqşamğa qadar bulunğan yeri belgisiz qaldı.

 13 dekabr künü Aqmescitteki Kiyev rayon mahkemesi Edem Bekirovnı 2019  senesi fevralniñ 11-ine qadar hapiske aldı. 20 dekabr künü FSB tarafından qanunsız silãh satqanı, patlayıcı şeylerni qanunsız saqlağanı, satqanı, başqa yerge keçirgeninde resmiy şekilde qabaatlandı.

11 iyün künü insan haqları boyunca Avropa mahkemesi Edem Bekirovnı acele hastahanege yatqızmaq hükmüni çıqardı.

 10 iyülde insan haqları boyunca Avropa mahkemesi 1 gruppa saqat, siyasiy mabus Edem Bekirovğa nisbeten yañı qarar çıqardı. Şu qararğa dair serbest ve ihtisaslı ekimler tibbiy tetqiq keçirip, sağlığınen bağlı tafsilãtlı hulãsa çıqarmalı ediler.

27 avgust künü Aqmescitteki Merkeziy rayon mahkemesi Edem Bekirovğa nisbeten hükmüni deñiştirip, onı Aqmescit hapishanesinden yiberdi.

Edem Bekirov Novoalekseyevka köyüniñ faal cemaatçılarından biridir. O, 1 gruppa saqatı. 2018 senesi 1 yanvar künü yürek ameliyatını keçirdi. Şundan da ğayrı, sağ ayağında protezi bar.