Qırımtatar Maaliy Merkezi

‘Yapmağanımız şey içün peşman olmaycaqmız’-Pankin Qırım işğali haqqında

08.06.2021

Rusiye ÇİN baş muavini Aleksandr Pankin Rusiye Federatsıyası ‘yapmağan şey içün peşman olmaycağını’, kimse barıp, sanktsıyalarını lãğu etmege rica etmeycegini ve Qırımnı kimsege bermeyceğini bildirdi. Bu aqta ‘İnterfaks’ agentligi haber ete.

‘Rusiye sanktsiyalarnı lãğu etmege rica etmeycek. Yapmağanımız şey içün peşman etmeycegimiz añlaşıla. Qırımnı da kimsege bermeycegimiz añlaşıla. Qarşı çıqmaq- yañı sanktsıyalarğa azır olmaq demektir. Elbette, kerek olğan vaqıtta qullanılması mümkün olacaq bir sıra qoşma tedbirlerimiz bar’,- dedi o.

Hatırlatamız ki, 12 mart künü, Avropa birligi Ukraina bütünliginiñ darqalmasına ait olğan 177 adam ve 48 teşkilãtqa nisbeten şahsiy sanktsiyalarnı daha yarımyılğa uzattı. Soñra Kanada ve Avstraliya Keriç köprüniñ qurulmasına alãqası olğan fizik ve yuridik şahıslarğa qarşı yañı sanktsıyalarnı kirsetti. Şundan da ğayrı, AQŞ Prezidenti Co Bayden telükeli, zararlı tış faaliyeti içün Rusiyege qarşı yañı sanktsıyalarnı kirsetti.