Qırımtatar Maaliy Merkezi

Ekinci Aqmescit ‘Hİzb ut-Tahrir davası’nıñ iştirakçilerine ceza müddeti uzatıldı

08.06.2021

Bazarertesi künü, 7 üyünde, Cenübiy arbiy mahkeme ekinci Aqmescit ‘Hizb ut-Tahrir davası’nıñ iştirakçilerine hapiste bulunma müddetini uzattı. Enver Ametov, Osman Arifmemetov, Yaşar Muyedinov, Ruslan Suleymanov, Rustem Şeyhaliyev ceza evinde 2021 senesi sentãbrniñ 20-sine qadar qalacaqlar.

Hatırlatamız ki, eki yıl evel, 2019 senesi martnıñ 27-sinde, rusiye silãhlı küçler  işğal etilgen Qırımda qırımtatarlarnıñ 26 evinde tintüvler keçirdiler. Bazı cemaatçılarnıñ evinden silãhlı küçler özleri gizliden qaldırğan edebiyat tapıp çıqardılar. Kitaplardan ğayrı adamlarnıñ telefonları, bilgisayar, pasportları alına edi. Silãhlılar özlerini qaba alıp bara, yaqalanğanlarğa qarşı fizik küçüni işlete, evlerge ayaqqapnen kire, advokatlarnı yibermey ediler. Neticede 20 adam yaqalandı, olarnı Rusiyede yasaq etilgen ‘Hizb ut- Tahrir’ teşkilãtında iştirak etkenlerinde qabaatlaylar. Martnıñ 28-inde daha 3 qırımtatarı yaqalandı.  27-28 mart künleri işğalcı mahkeme 23 yaqalanğan cemaatçını hapiske aldı ve ileride hepisiniñ hapis müddeti uzatıldı.