Qırımtatar Maaliy Merkezi

‘Deputat, Kreml mabuslarına yardım et’ (videorolik)

07.06.2021

Qırım deookupatsıyası ve qırımtatar halqına destek oğrunda ğayret köstergen #LIBERATECRIMEA halqara areketi ‘Deputat, Kreml mabuslarına yardım et’ kampaniyasınıñ çerçivesinde videorolikni taqdim ete. Ukrain memurlarını rusiye işğalcıları tarafından taqip etilgen qırım sakinlerini öz imayeleri altına almağa çağıramız.

Ukrain memurlarına teklif etile:

1.     Matbuat-konferentsıyası, Facebook sahifesi, Twitterde halq ögünde Kreml mabuslarından birini imaye altına alğanını bildirmek;

2.     Ayda eñ azdan bir kere bu siyasiy mabus haqqında halq ögünde bildirmek;

3.      Ukraina Prezidenti Ofisi, Ukraina çetel işler Nazirligi ve diger devlet organlarına  qırım esirlerini azat etmek meselesiniñ çezilmesini tezleştirmek ricasınen muracaat etmek;

4.      Mabus ve ailelerine huquqiy, siyasiy, informatsıon, maddiy ve diger yardımda bulunmaq;

5.     Diger devlet memur-meslekdeşlerini mabuslarnı imaye altına almağa celp etmek;

6.     Üçtaraflı kontakt gruppasına imaye altında bulunğan mabuslarnı almaşuv cedveline kirsetmek talabınen muracaat etmek;

7.     Mabuslarnıñ haqlarını qorumasını temin etilmesine doğrultılğan qanuncılıq faaliyetini amelge keçirmek;

8.     Mabus haqlarını qorçalamasına doğrultılğan diger tedbirlerni amelge keçirmek;

9.     Siyasiy imaye añlamı maddiy yardımnı közde tutmay.

Hatırlatamız ki, Qırım deookupatsıyası oğrunda Halqara areket ve #LIBERATECRIMEA qırımtatar halqına qoltutqan areket ‘Atalıq’ halqara kampaniyası çerçivesinde  ‘Deputat, Kreml mabuslarına yardım et’ kampaniyasını başlattı ve ukrain memurlarını rusye işğalcıları tarafından taqip etilgen qırım sakinlerini öz imayeleri altına almağa çağırdı.

24 fevral künü, ‘Qırım platforması: Qırım deokkupatsıya yolu’ adlı tögerek masa ketişatında ‘Golos’(‘Ses’) fraktsıyasınıñ deputatı Solomiya Bobrovskaya mezkür kampaniyağa qoltutıp, Refat Alimov ve Galina Dovgopolaya mabuslarını öz imayesi altına aldı.

10 mart künü halq deputatı Vladimir Aryev de mezkür kompaniyağa qoltutıp,  3 mabus-Rustem İsmailov, Enver Omerov ve Riza Omerovnı öz imayesi altına aldı.