Qırımtatar Maaliy Merkezi

Ukraina Yuqarı Şurasınıñ deputatı Vladimir Aryev Avropa Keñeşine işğal etilgen Qırımda insan haqlarınen bağlı vaziyetni hatırlattı

07.05.2021

‘Avropa birdemligi’ fraktsıyasından halq deputatı Vladimir Aryev Avropa Keñeşiniñ baş kãtibi Mariya Peyçinoviç-Buriçke mektüp yolladı. Şu mektüpte işğal etilgen Qırımda insan haqlarınen bağlı vaziyetni añlattı. ‘Deputat, Kreml mabuslarına yardım et’ kampaniyası çerçivesinde Aryev qırımtatar halqnıñ vaziyetine ayrı diqqat çekip, şu cümleden Omerovlar ailesi misalinde ailece taqipler yüz bergenini hatırlattı.

Öz tarafından, Aryevge yazılğan cevabında Mariya Peyçinoviç-Buriç Avropa Keñeşi gumanitar vaziyeti ve Qırımda insan haqlarınen bağlı vaziyetni diqqatnen közetkenlerini qayd etti ve Avropa Keñeşi Ukraina territorial bütünligi ve suverenitetine qoltutmağa devam etkenini bildirdi.

‘Avropa Keñeşi Qırımda gumanitar vaziyet ve insan haqlarınen bağlı vaziyetni diqqatnen közete. Bilgeniñiz kibi Qırımda yaşağan insanlarnıñ haqlarını qorçalamaq içün her mümkün olğan usullardan faydalanmalımız. Yazıq ki, bizim insan haqlarını monitoring mehanizmlerimiz yarımadağa yetalmay, amma Avropa Keñeşi bu Saada çalışmağa devam etkenine emin ola bilesiz’,- denile mektüpte.