Qırımtatar Maaliy Merkezi

İşğalcılar granata üstünde Vladislav Yesipenkonıñ parmaq izlerini tapmadılar

06.05.2021

Çarşenbe künü, mayısnıñ 5-inde jurnalist Vladislav Yesipenkonıñ ‘davası’ boyunca ‘mahkeme’ toplaşuvı olıp keçti. Toplaşuv devamında sanki Yesipenkoda tapılğan granatanıñ üstünde onıñ parmaq izleri bulunmağanı belli oldı. Bu aqta ‘Qırım.Aqiqat’ haber ete.

‘Bugün, 5 mayıs künü FSB binasında Vladislav Yesipenkonen bağlı tahqiq işleri keçirildi.  Tahqiq işleri neticesinde, evelden sanki Yesipenkoda tapılğan granata üstünde onıñ parmaq izleri tapılmadı,’- dedi advokat Aleksey Ladin.

 Şundan da ğayrı,  Vladislav Yesipenko daha bir madde boyunca, yani patlayıcı maddeler işlep çıqarğanı ve saqlağanında qabaatlandı.

 Hatırlatamız ki, 2021 senesi martnıñ 10-da Qırım Muhtar Cumhuriyetinde  RF FSB Ukraina vatandaşı Vladislav Yesipenkonı ‘Ukraina mahsus hızmetler menfaatına’ malümat toplağanı içün tutuqlandı. Erkekni mayısnıñ 11-ine qadar hapislediler. Siyasiy mabus eki kün devamında elektrik işkencesine oğratılğan edi. Böyle etip, ilk sahte itiraf malümatları alındı.