Qırımtatar Maaliy Merkezi

İşğal etilgen Qırımda 2021 senesiniñ ilk çeriginde 23 sorğu qayd etildi

05.05.2021

2021 senesiniñ ilk çerigi devamında 23 sorğu, olardan 9-ı qırımtatarlarğa nisbeten keçirildi. Keçken senege baqqanda sorğular sayısı eksildi. Bu aqta Qırımtatar resurs merkezi tarafından hazırlanğan 2021 senesiniñ ilk çeriginde Qırımda insan haqlarını bozuvlarınıñ talilinde bahs etile.

Sorğularğa tintüvden soñra tutuqlanğan qırımlılar çekildi. Yaqalanğanlar RF yasaq olunğan ‘Hizb ut-Tahrir’, ‘İyegova şaatları’ kibi teşkilãtlarda iştirak etkenleri içün qabaatlanalar. Sorğulardan biri rusiye silãhlı küçler tarafından Qırım sıñırında keçirilgen edi. Şundan da ğayrı, belgilengen devir içerisinde siyasiy mabuslarnıñ tuvğanları, piketke çıqqan faal cemaatçılar sorğuğa çekilgenleri belli.

Hatırlatamız ki, Qırımtatar resurs merkezi işğal etilgen Qırımda 2021 senesiniñ ilk çeriginde yüz bergen insan haqlarını bozuvlarınıñ talilini taqdim etti. Teşkilãtnıñ bildirgenine köre, mezkür vaqıt içerisinde 22 tintüv, 146 yaqalama, 23 sorğu keçirilgen edi. Yılnıñ ilk üç ayında umumen 45 adam hapiske alındı: 10-yañı, 16-müddetni uzatuv, 19-mahkeme hükümi. Adaletli mahkeme haqqınıñ bozuvı 113 kere yüz bergen edi.  Fizik ve psihik sağlığına dair haqlarnıñ bozulması 51 kere qayd etildi. Şundan da ğayrı, 33 kere siyasiy mabuslar Qırımda başqa yerlerğe alıp ketildi. QRM esabatında din haqları, yarımadada ekologik normaları, hapisteki müşkül şaraitler, siyasiy mabuslarnıñ haqları bozulğanı ve işğal etilgen Qırımda qanunsız arbiy talimler keçirilgeni haqqında malümat bulunmaqta.